İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 114 Hüküm no: 77 Orijinal metin no: [22a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahıska’da öldürülen Süleyman b. Mustafa’nın vârisi Vekîlharc Mehmed Efendi’nin, suçlanan Bostancı Ali b. Feyzullah ile iki yüz guruş bedelle sulh olduğu ve zimmetini ibra ettiği Vilâyet-i Anadolu’da Ahıska kasabasında sâkin iken bundan akdem ber-vech-i âtî katîlen vefât eden Süleyman b. Mustafa b. Abdullah’ın li-ebeveyn er karındaşı ve hasren vârisi olduğu lede’ş-şer‘i’l-enver zâhir ve mütehakkık olup mahmiye-i İstanbul’da hâlâ Dergâh-ı âlî yeniçerileri ağası izzetlü ağa hazretlerinin hizmetlerinde olan Vekîlharc Mehmed Efendi nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb Bostânî Ali b. Feyzullah nâm kimesne mahzarında ikrâr-ı tâm ve takrîr-i kelâm edip bin yüz doksan iki senesi Ramazanü’l-mübâreke’nin yirmi dokuzuncu günü târihinde kasaba-i merkūmede Aşağı Mahalle’de vâki‘ Köprübaşı nâm mahâlde mezbûr Ali karındaşım mûrisim mezbûr Süleyman’ı Lezgî kaması ta‘bîr olunur kebîr bıçak ile bi-gayr-ı hakkın amden karnına darb ü cerh ve katletmekle mûceb-i şer‘îsini bundan akdem ben merkūm Ali’den taleb ve da‘vâ eylediğimde, ol dahi inkâr etmekla beynimizde münâza‘ât-ı kesîre ve muhâsemât-ı şedîde cereyân etmişidi. El-hâletü-hâzihî beynimize muslihûn tavassut edip da‘vâ-yı mezkûremden beni merkūm Ali ile an-inkâr iki yüz guruş üzerine ber-nehc-i şer‘î sulh eylediklerinde, ben-dahi ber-minvâl-i muharrer sulh-i mezkûru kabûl ve bedel-i sulh-i merkūm iki yüz guruşu mezbûr Ali’nin yedinden tamamen ahz ve kabz edip karındaşım müteveffâ-yı merkūmun dem ve diyetine ve bi’l-cümle husûs-ı mezkûra müte‘allika âmme-i de‘âvî ve mutâlebât ve kâffe-i eymân ve muhâsamâtdan [22b] mezbûr Ali’nin zimmetini ibrâ-i âmm-ı kātı‘ü’n-nizâ‘la ibrâ ve ıskāt eylediğimde, ol dahi ibrâ-i mezkûru kabûl eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 21 min-Zilka‘de sene [1]193. Şuhûdü’l-hâl: Cicerik?-zâde Ali Bey, el-Hâc Mehmed b. Mustafa, Osman Efendi b. Ahmed, Hasan b. Mehmed, Ahmed Ağa b. Abdullah, Salih b. Ali, Çukadar İsmail b. Ali.