İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 116 Hüküm no: 80 Orijinal metin no: [23a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Mehmed Ali b. Nurullah’ın Kasımpaşa’daki ekmekçi fırını ve değirmenin dört hissesini Mahmud Beşe b. Mustafa’ya beş yüz guruşa sattığı Habbâz tâifesinden el-Hâc Mehmed Ali b. el-Hâc Nurullah nâm kimesne tarafından husûs-ı âtiyyü’l-beyânda ber-vech-i câ’î ikrâra vekîl olduğu Yiğitbaşı Ahmed Ağa b. el-Hâc Mustafa ve Sayıcı Molla Osman b. Mustafa nâm kimesneler şehâdetleriyle şer‘an sâbit ve mütehakkık olan Mehmed Efendi b. Ömer nâm kimesne meclis-i şer‘-i hatîr-i lâzımü’t-tevkīrde bâ‘is-i hâze’l-vesîka Mahmud Beşe b. el-Hâc Mustafa nâm kimesne mahzarında bi’l-vekâle ikrâr-ı tâm ve takrîr-i kelâm edip mahrûse-i Galata’ya muzâfe Kasaba-i Kasımpaşa’da Yahya Kethudâ Mahallesi’nde vâki‘ bir bâb ekmekçi fırını ve ona merbût kasaba-i merkūmede Debbağhâne kurbünde kâin üç horoslu bir bâb değirmen derûnunda mevcûde beyne’l-hiref gedik ta‘bîr olunur müvekkilim mezbûr el-Hâc Mehmed Ali akd-i âti’z-zikrin sudûruna değin yedinde mülkü olan on iki re’s bargirin ancak dört re’si ile dört re’s bargire isâbet eden âlât-ı lâzıme-i ma‘lûmelesini tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile beş yüz guruşa mezbûr Mahmud Beşe’ye bey‘ ve temlîk ve teslîm eylediğinde, ol dahi ber-vech-i muharrer iştirâ ve temellük ve tesellüm ve kabûl ve semeni olan meblağ-ı mezbûr beş guruşu müvekkilim mezbûre def‘ ü teslîm eylediğinde, ol dahi yedinden tamamen ve kâmilen tesellüm ve ahz ü kabz edip mebî‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve mutâlebât ve kâffe-i eymân ve muhâsamâtdan müvekkilim mezbûr el-Hâc Mehmed Ali merkūm Mahmud Beşe’nin zimmetini ibrâ-i âm ile ibrâ ve ıskāt eylediğinde, ol dahi ibrâ-i mezkûru kabûl eyledi. Ba‘de’l-yevm sâlifü’z-zikr dört re’s bargir ile dört re’s bargire isâbet eden âlât-ı lâzıme-i ma‘lûmede müvekkilim mezbûr el-Hâc Mehmed Ali’nin alâkası kalmayup müşteri-i mezbûr Mahmud Beşe’nin mülk-i müşterâsı olmuşdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 25 min-Zilka‘de sene [1]193. Şuhûdü’l-hâl: eş-Şâhidûne’s-sâbıkūn.