İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 117 Hüküm no: 81 Orijinal metin no: [23a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kirkor v. Panos’un Üsküdar Kartal’daki ekmekçi ve çörekçi fırını gediğinin nısfını Kirispo v. İspiro ile ortağı Vasil v. Manuk’a beş yüz guruşa sattığı Habbâz tâifesinden Kirkor v. Panos nâm zimmî meclis-i şer‘-i hatîr-i lâzımü’t-tevkīrde hâmil-i hâzihi’l-vesîka Kirispo v. İspiro ve şerîki Vasil v. Manuk nâm zimmîler muvâcehelerinde ikrâr-ı tâm ve takrîr-i kelâm edip medîne-i Üsküdar’a muzâfe [23b] Kartal kasabasında vâki‘ Emin Ağa fırını demekle [ma‘rûf] bir bâb habbâz ve çörekçi fırını derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin akd-i âti’z-zikrin sudûruna dek yedimde mülküm olan nısf-ı şâyi‘ini tarafeynden îcâb ve kabûlü hâvî şürût-ı müfside <> ve muvâza‘adan ârî bey‘-i bâtt-ı sahîh-i şer‘î ve safka-i vâhide ile beş yüz guruşa ale’l-iştirâki’s-seviy mersûmân Kirispo ve Vasil zimmîlere bey‘ ve temlîk ve teslîm eylediğimde, onlar dahi ber-minvâl-i muharrer iştirâ ve temellük ve tesellüm ve kabûl ve semeni olan meblağ-ı mezbûr beş yüz guruşu bana def‘ ü teslîm eylediklerinde, ben dahi yedlerinden tamamen tesellüm ve ahz ü kabz edip mebî‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve mutâlebât ve kâffe-i eymân ve muhâsamâtdan mersûmân Kirispo ve Vasil zimmînin zimmetlerini ibrâ-i âm ile ibrâ ve ıskāt eylediğimde, onlar dahi ibrâ-i mezkûru kabûl eylediler. Ba‘de’l-yevm benim asla alâkam kalmayup nısf-ı âlât-ı mezkûre müşteriyân-ı mersûmân Kirispo ve Vasil zimmîlerin ale’l-iştirâki’s-seviy mülk-i müşterâları olmuşdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 25 min-Zilka‘de sene 1193. Şuhûdü’l-hâl: Şâhidûne’s-sâbıkūn.