İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 120 Hüküm no: 84 Orijinal metin no: [24a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Ayşe Hatun bt. Abdullah’dan küçük çocuklarına intikal eden Kazasker Mehmed Efendi Mahallesi’ndeki menzilin nısfının satışı için babaları ve vasîleri Ömer b. Hamza’ya izin verildiği Mahmiye-i İstanbul’da Yenibahçe kurbünde Kādıasker Mehmed Efendi Mahallesi’nde sâkine iken bundan akdem vefât eden Âişe Hatun bt. Abdullah b. Abdurrahman’ın sadrî sagīr oğlu es-Seyyid Mehmed ve sadrıye sagīre kızı Şerîfe Âmine’nin babaları ve bâ-hüccet-i şer‘iyye vasîleri bâ‘isü’l-vesîka es-Seyyid Ömer b. es-Seyyid Hamza nâm kimesne meclis-i şer‘-i şerîf-i enverde bi’l-vesâye takrîr-i kelâm ve ta‘bîr ani’l-merâm edip Habibe Hatun nâm sahibetü’l-hayrın vakfı müstagallâtından olup mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât bir bâb menzilin nısfı benim ve nısf-ı şâyi‘-i âharı müteveffât-ı mezbûrenin ile’l-vefât ale’l-iştirâki’s-seviy bi’l-icâreteyn taht-ı tasarrufumuzda olup ve ba‘de vefâtihâ menzil-i mezkûrun nısf-ı şâyi‘-i âharı sagīrân-ı mezbûrâna intikāl-i âdî ile intikāl edip lâkin menzil-i mezbûr mürûr-ı eyyâm ile müşrif-i harâb ve mâil-i türâb ve hâsılı harcına vefâ etmeyüp bekāsı sagīrân-ı mezbûrâna muzırr olmağla, nısf-ı menzil-i mezkûr bedel-i misli ve bâ-ma‘rifet-i mütevellî âhara ferâğ ve bedeli istirbâh olunmak sagīrân-ı mezbûrân haklarında her vechile enfa‘ ve evlâ olmağın hakīkat-i hâl hâzırûn bi’l-meclis Müslimînden ba‘de’l-istihbâr kıbel-i şer‘den ber-vech-i muharrer âhara ferâğa bana izin verilmek bi’l-vesâye matlûbumdur dedikde fi’l-hakīka kazıyye vech-i muharrer üzere olduğu zeyl-i kitâbda muharrrerü’l-esâmî Müslimîn ihbârlarıyla lede’ş-şer‘i’l-enver zâhir olmağın, hâkim-i muvakki‘-i sadr-ı kitâb [24b] ‒tûbâ-lehû ve hüsnü-meâb‒ efendi hazretleri dahi sagīrân-ı mezbûrânın hisse-i şâyi‘alarını bedel-i misli ve bâ-ma‘rifet-i mütevellî âhara ferâğ ve bedel-i merkūmu kabz ve defter-i kassâma idhâle vasî-i mezbûr es-Seyyid Ömer’e izin verilmeğin mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-Zilhicceti’ş-şerîfe li-sene selâse ve tis‘în ve mie ve elf. Şuhûdü’l-hâl: Baltacı el-Hâc Mustafa el-Muhzır, Uzun Hasan b. Musa el-Muhzır, Torun Mustafa b. Abdullah el-Muhzır, Hâfız Feyzullah Efendi b. İsmail, Müezzin el-Hâc Ahmed Efendi, Molla Abdullah b. Abdullah, Ahmed el-Muhzır, Yeğen Mustafa.