İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 119 Hüküm no: 83 Orijinal metin no: [24a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadı Mehmed Celaleddin Efendi’nin Çubukçular Çarşısı’ndaki ekmekçi fırını ve değirmenin kiracısı Peço v. Kolo ile kira bedelleri ve tamir hususlarında anlaştıkları Mahmiye-i İstanbul’da Kovacı Dede Mahallesi’nde sâkin sâbıkā Yenişehr-i Fener kādısı umdetü’l-mevâliyyi’l-izâm zübdetü’l-fudelâ’i’l-kirâm râfi‘-i hâze’l-kitâb Mehmed Celaleddin Efendi hazretleri tarafından husûs-ı âti’l-beyânda ber-vech-i câ’î ikrâra vekîl-i müseccel-i şer‘îsi es-Seyyid Mehmed Ağa b. İsmail nâm kimesne meclis-i şer‘-i hatîr-i lâzımü’t-tevkīrde ekmekçi tâifesinden Peço v. Kolo nâm zimmî muvâcehesinde bi’l-vekâle ikrâr-ı tâm ve takrîr-i kelâm edip müvekkilim mûmâ-ileyh Celaleddin Efendi’nin mahmiye-i merkūmede Sultân Selim Câmi‘-i şerîfi kurbünde Çubukcular sûkunda vâki‘ Nerdübânsız Fırın demekle ma‘rûf bi’l-icâreteyn taht-ı tasarrufunda olan bir bâb ekmekçi fırını ve ona merbût ittisâlinde kâin dört horoslu bir bâb değirmende mersûm Peço zimmî beher şehir otuz[ar] guruş kirâ ile müste’ciri olmağla müvekkilim mûmâ-ileyh kirâ-yı merkūmun beher şehir yirmi beşer guruşunu mersûmun yedinden ahz ve beşer guruşunu zikrolunan fırın ve değirmenin iktizâ eden ta‘mîrâtına harc ve sarf etmek içün mersûm Peço zimmînin yedinde ibkā edip lâkin mersûm Peço zimmî beher şehir beşer guruşdan târih-i kitâba gelince yüz elli ayda müctemi‘ yedi yüz elli guruşu sâlifü’z-zikr fırın ve değirmenin ta‘mîrâtına harc ve sarf etmeyüp yedinde kalmağla meblağ-ı mezbûru müvekkilim mûmâ-ileyh bundan akdem mersûm Peço zimmîden taleb ve da‘vâya tesâddî etmişidi. El-hâletü-hâzihî da‘vâ-yı mezkûresinden rızâsıyla fâriğ olup meblağ-ı mezbûr yedi yüz elli guruş mutâlebesine müte‘allika âmme-i de‘âvî ve mutâlebât ve kâffe-i eymân ve muhâsemâtdan mersûm Peço zimmînin zimmetini ibrâ-i âm ile ibrâ ve ıskāt eylediğinde, mersûm Peço zimmî dahi ibrâ-i mezkûru ba‘de’l-kabûl işbu sene-i mübârekede mârrü’z-zikr fırın ve değirmenin döşemesi mesârifine kendi mâlından harc ve sarf edip müvekkim mûmâ-ileyhden taleb etmeyüp ve işbu târih-i kitâbdan kadîmî kirâları olan otuzar guruşu müvekkilim mûmâ-ileyhe mâh-be-mâh tamamen edâ ve teslîm etmek üzere ta‘ahhüd eylediğinde, müvekkilim mûmâ-ileyh dahi ta‘mîr husûsu içün kirâ-yı merkūmdan mersûm Peço zimmînin yedinde bir akçe ve bir habbe ibkā etmeyüp zikrolunan fırın ve değirmenin cüz’î ve küllî iktizâ eden ta‘mîrâtını kendi mâlından harc ve sarf etmek üzere müte‘ahhid oldu dedikde mersûm Peço zimmî dahi mukırr-ı vekîl-i mezbûru kelimât-ı meşrûhasında vicâhen ve şifâhen tasdîk ve tahkīk ettikden sonra hazır bi’l-meclis Habbâzân Kethudâsı İsmail Ağa nâm kimesne dahi mârrü’z-zikr otuzar guruş kirânın târih-i merkūmdan beher şehir hıtâmında müvekkil-i mûmâ-ileyh Mehmed Celaleddin Efendi hazretlerine edâsına kefîl ve dâmin olmağın mâ-vaka‘a bi’t-taleb ketb olundu. Fî 25 min-Zilka‘de sene [1]193. Şuhûdü’l-hâl: eş-Şâhidûne’s-sâbıkūn.