İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 124 Hüküm no: 88 Orijinal metin no: [25b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Ekmekçi Serkiz v. Ağyazar’ın vârislerinin Üsküblü Mahallesi’ndeki uncu değirmenindeki dört hisselerini Haçuk v. Serkiz’e altı yüz guruşa sattıkları Mahmiye-i İstanbul’da Nahılbend Mahallesi’nde mütemekkin iken bundan akdem hâlik olan Ekmekçi Serkiz v. Ağyazar v. Keriç nâm zimmînin verâseti zevce-i metrûkesi Koğaz bt. Abraham nâm Nasrâniyeye ve sulbî kebîr oğulları Begos ve Bedros ve Panos ve Haçuk nâm zimmîler ile sulbiye kebîre kızları Maryam ve Gülbahar ve Turfanda ve Kızıl nâm Nasrâniyelere münhasıra olduğu ba‘de’t-tahakkukı’ş-şer‘î mersûmûn Koğaz ve Begos ve Bedros ve Panos ve Haçuk ve Maryam ve Gülbahar ve Turfanda ve Kızıl taraflarından ber-vech-i câ’î bey‘ ve kabz-ı semen ve ibrâya vekîlleri olduğu mersûmât Koğaz ve Maryam ve Gülbahar ve Turfanda ve Kızıl Nasrâniyelerin şahıslarını bi’l-ma‘rifeti’ş-şer‘iyye ârifân Uncular Kethudâsı Mustafa Ağa b. Ahmed ve es-Seyyid Mehmed Said Ağa b. es-Seyyid el-Hâc Mustafa nâm kimesneler şehâdetleriyle şer‘an sâbit ve mütehakkık olan hâlik-i mesfûrun li-ebeveyn er karındaşı Artin nâm zimmî meclis-i şer‘-i şerîf-i enverde hâmil-i hâzihi’l-vesîka Haçuk v. Serkiz nâm zimmî muvâcehesinde bi’l-vekâle ikrâr-ı tâm ve takrîr-i kelâm edip mahmiye-i merkūmede Üsküblü Mahallesi’nde vâki‘ dört horoslu bir bâb uncu değirmeni derûnunda mevcûde beyne’l-hiref gedik ta‘bîr olunur on altı re’s bargirin dört re’s ile dört re’s bargire isâbet eden âlât-ı lâzıme [-i ma‘lûme] hâlik-i mersûm Serkiz zimmînin hayatında ile’l-helâk yedinde mülkü ba‘de helâkihî müvekkillerim mersûmûna mevrûs olmağla, akd-i âti’z-zikrin sudûruna dek ber-minvâl-i muharrer müvekkillerim mersûmûnun yedlerinde mülk-i mevrûsları olan sâlifü’z-zikr dört re’s bargir ile dört re’s bargire isâbet eden âlât-ı lâzıme-i ma‘lûmeyi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile altı yüz guruşa bi’l-vekâle mesfûr Haçuk zimmîye bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezbûr altı yüz guruşu bana def‘ ü teslîm eylediğinde, ben-dahi yedinden tamamen tesellüm ve ahz ü kabz edip mebî‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve mutâlebât ve kâffe-i eymân ve muhâsemâtdan mersûm Haçuk zimmînin zimmetini bi’l-vekâle ibrâ-i âm ile ibrâ ve ıskāt eylediğimde, ol dahi ibrâ-i mezkûru kabûl eyledi. Ba‘de’l-yevm müvekkillerim mersûmûnun asla alâka ve medhalleri kalmayup zikrolunan dört re’s bargir ile dört re’s bargire isâbet eden âlât-ı lâzıme-i ma‘lûme müşteri-i mesfûr Haçuk zimmînin mülk-i müşterâsı olmuşdur, keyfe mâ yeşâ’ mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 25 Muharrem sene [1]194. Şuhûdü’l-hâl: İsmail Ağa Kethudâ-yı Habbâzân, Kanlıfırınlı <> Hacı Ahmed Ağa, Mustafa Ağa Kethudâ-yı Uncuyân, es-Seyyid Mehmed Said Ağa, Fındıklı[lı] Mehmed Ağa.