İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 125 Hüküm no: 89 Orijinal metin no: [25b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Mehmed Bey b. Veliyüddin Paşa’nın vârislerinin kendilerine intikal eden Rodos Adası Dolaplı Mescid Mahallesi’ndeki menzil ve müştemilatını İbrahim Kapudan b. Hasan’a iki bin sekiz yüz guruşa sattıkları Bahr-i sefîd’de vâki‘ Rodos cezîresinde sâkin iken bundan akdem vefât eden Mehmed Bey b. Veliyüddin Paşa’nın verâseti zevce-i menkûha-i metrûkesi Ümmühan bt. Abdullah nâm hatun ile sulbî kebîr oğlu Kuyumcubaşı Mehmed Emin Bey’e ve sulbiye kebîre kızı Nefise Hanım’a münhasıra ve tashîh-i meselesi yirmi dört sehmden olup sihâm-ı mezkûreden üç sehmi mezbûre Ümmühan Hatun’a ve on dört sehmi merkūm Mehmed Emin Bey’e ve yedi sehmi mezbûre Nefise Hanım’a isâbet eylediği ba‘de’t-tahakkukı’ş-şer‘î mahmiye-i İstanbul’da Sultân Ahmed Câmi‘-i şerîfi kurbünde Firuzağa Mahallesi’nde sâkin merkūm Mehmed Emin Bey kendiden asâleten ve vâlidesi merkūme Ümmühan Hatun ile kız karındaşı mezbûre Nefise Hanım taraflarından husûs-ı âtiyyü’l-beyânda ber-vech-i câ’î bey‘ ve kabz-ı semene vekîl olduğu Ahmed Beşe b. Mehmed ve es-Seyyid Mehmed b. es-Seyyid İbrahim nâm kimesneler şehâdetleriyle şer‘an sâbit ve mütehakkık olmağla vekâleten meclis-i şer‘-i hatîr-i lâzımü’t-tevkīrde işbu bâ‘isü’l-kitâb [26a] İbrahim Kapudan b. Hasan nâm kimesne mahzarında ikrâr-ı tâm ve takrîr-i kelâm edip babam mûrisimiz müteveffâ-yı mezbûr Mehmed Bey’in hayatında ile’l-vefât yedinde mülkü ve ba‘de vefâtihî benim ile müvekkilelerim mezbûretâna mevrûs akd-i âti’z-zikrin sudûruna dek ber-vech-i tashîh-i mezkûr yedimizde mülkümüz olup sâlifü’z-zikr Rodos’da Dolâblı Mescid Mahallesi’nde vâki‘ bir tarafdan sâbıkā Kāimmakām-ı Sadr-ı âlî Melek Mehmed Paşa hazretleri mülkü ve bir tarafdan ba‘zan Kasab Süleyman ve ba‘zan es-Seyyid Mehmed menzilleri iki tarafdan tarîk-ı âm ile mahdûd hâriciye ve dâhiliyede büyût-ı adîde [ve] iki dolab kuyusu ve iki havuz ve iki kıt‘a limon ve portakal bağçeleri ve müştemilât-ı sâire-i ma‘lûmeyi hâvî bir bâb mülk menzili, bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile iki bin sekiz yüz guruşa mezbûr İbrahim Kapudan’a bi’l-asâle ve bi’l-vekâle bey‘ ve temlîk ve mahâllinde zabt ve tesellüme taslît eylediğimde, ol dahi ber-vech-i muharrer iştirâ ve temellük ve kabûl ve semeni olan meblağ-ı mezbûr iki bin sekiz yüz guruşu bana def‘ ve teslîm eylediğinde, ben-dahi bi’l-asâle ve bi’l-vekâle yedinden tamamen tesellüm ve ahz ve kabz eyledim. Ba‘de’l-yevm benim ve müvekkilelerim mezbûretân Ümmühan ve Nefise Hanım’ın asla alâka ve medhallerimiz kalmayup menzil-i mahdûd-ı mezkûr müşteri-i merkūm İbrahim Kapudan’nın mülk-i müşterâsı olmuşdur, keyfe mâ yeşâ’ ve yahtâr mutasarrıf olsun [dedikde] gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 28 min-Muharrem sene [1]194. Şuhûdü’l-hâl: İbrahim b. Mustafa, Mehmed b. el-Hâc Hüseyin, Osman Hoca b. el-Hâc Yahya, Rodos-balcı Mehmed Kapudan, Hâfız Sinan Efendi b. Hamza.