İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 160 Hüküm no: 129 Orijinal metin no: [37b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boğdurulan Zülfikar b. Yakub’un vârislerinin katli emreden Fethülislam kaymakamı Mustafa Ağa b. Mehmed ile diyet ve eşya davasında sekiz yüz guruş karşılığında sulh oldukları ve ibralaştıkları Sulh an-diyet ve eşyâ Sevâhil-i Nehr-i Tuna’da vâki‘ Feth-i İslâm kazâsına tâbi‘ Rahova iskelesi emîni olup bundan akdem mahnûkan fevt olan Zülfikar b. Yakub’un verâseti vâlidesi Fâtıma bt. Yakub b. Abdullah nâm hatun ile li-ebeveyn er karındaşları Yahya ve Mustafa’ya münhasıra oldukdan sonra mezbûr Yahya kendi tarafından asâleten ve vâlidesi mezbûre Fâtıma ve Mustafa taraflarından husûs-ı âti’z-zikri taleb ve da‘vâ ve lede’l-iktizâ sulh ve ibrâya ve bedel-i sulhu kendülere irsâl ve îsâle vekîl olduğu Murad Beşe b. Cafer ve Abdullah Beşe b. Ali nâm kimesneler şehâdetleriyle sâbit olmağla vekâleten meclis-i şer‘-i hatîr-i lâzımü’t-tevkīrde hâssa-i hasekiden olup zikrolunan Feth-i İslâm kāimmakāmı olan bâ‘isü’l-kitâb Mustafa Ağa b. Mehmed tarafından husûs-ı âtiyyü’z-zikrde kezâlik vekîl olduğu Molla Halil b. Yusuf ve el-Hâc Hüseyin b. Ali nâm kimesneler şehâdetleriyle sâbit olan es-Seyyid Ali Rıza Efendi b. es-Seyyid el-Hâc İbrahim nâm kimesne mahzarında bi’l-asâle ve bi’l-vekâle üzerine da‘vâ ve takrîr-i kelâm edip müvekkil-i mezbûr Haseki Mustafa Ağa bundan akdem mûrisimiz mezbûr Zülfikar’ı bi-gayr-ı hakkın boğdurdukdan sonra emvâlinden dahi mecmû‘u sekiz yüz guruş kıymetli eşyâ-i ma‘lûmesini bi-gayr-ı hakkın ahz ve kabz etmekle, mûrisimiz mezbûr Zülfikar’ın diyetini ve eşyâ-i mezkûrenin bi’l-asâle ve bi’l-vekâle reddini taleb ederim deyü tesâddî eylediğim da‘vâ-yı mezkûremden bâ-vesâtet-i muslihîn vekîl-i merkūm es-Seyyid Ali Rıza Efendi ile diyet da‘vâmdan altı yüz elli ve eşyâ da‘vâmdan yüz elli guruş ki cem‘an sekiz yüz guruş üzerine ba‘de akdi’l-musâlaha ve’l-kabûl bedel-i sulh-ı mezkûr cem‘an sekiz yüz guruşu vekîl-i mezbûr es-Seyyid Ali Rıza Efendi bana tamamen def‘ teslîm, ben-dahi ber-vech-i muharrer yedinden ahz ü kabz edip zikrolunan diyet ve eşyâ ve bi’l-cümle husûs-ı sâireye müte‘allika âmme-i de‘âvî ve mutâlebât ve kâffe-i eymân ve muhâsamâtdan bi’l-asâle ve bi’l-vekâle müvekkil-i merkūm Haseki Mustafa Ağa’nın zimmeti ile bi’l-cümle etbâ‘ının ve cemî‘ ahâlî-i kazâ ve re‘âyâsının zimmetlerini ibrâ-i âmm-ı sahîh-i şer‘î ile ibrâ ve ıskāt, ol dahi bana medfû‘u bedel-i sulh-ı mezkûra ve sâir[e] müte‘allika âmme-i de‘âvî ve mutâlebât ve kâffe-i eymân ve muhâsamâtdan benim ve müvekkillerim mezbûrân Fâtıma ve Mustafa’dan her birinin zimmetlerini ibrâ-i âm ile ibrâ ve ıskāt ve her birimiz âharın ber-vech-i muharrer ibrâsını kabûl eyledik <> dediğini vekîl-i merkūm es-Seyyid Ali Rıza Efendi tasdîk etmeğin mâ-hüve’l-vâki‘ bi’l-ibtigā sebt ve imlâ olundu. Fî 24 min-Rebî‘ülâhir sene [1]194. Şuhûdü’l-hâl: Sâbıkā Hırşova voyvodası Halil Ağa b. Yusuf, Nâib-i sâbık Osman Efendi b. el-Hâc Mustafa, es-Seyyid Musa b. Mustafa, Hâssa bostânîyânından Ali Ağa b. Yusuf, es-Seyyid Ömer Ağa b. es-Seyyid Ömer, Mehmed Said Efendi b. Mehmed Emin, Kāimmakām-ı sâbık Ser-turnâyî Abdullah Ağa.