İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 159 Hüküm no: 128 Orijinal metin no: [37a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çörekçi Mehmed Said Çelebi b. Mustafa’nın Ayasofya-ı kebîr Camii yakınındaki çörekçi dükkânı gediğinin nısfını Osman Çelebi b. Mahmud’a iki bin guruşa sattığı Mübâya‘a-i âlât-ı çörekçi Çörekçi tâifesinden es-Seyyid Mehmed Said Çelebi b. es-Seyyid el-Hâc Mustafa nâm kimesne meclis-i şer‘-i hatîr-i lâzımü’t-tevkīrde çörekçi esnâfının kethudâsı işbu bâ‘isü’l-kitâb Osman Çelebi b. Mahmud nâm kimesne mahzarında ikrâr-ı tâm ve takrîr-i kelâm edip işbu akd-i âti’z-zikrin sudûruna değin yedimde mülk ve hakkım olup İstanbul’da Ayasofya-i kebîr Câmi‘-i şerîfi kurbünde Sakalar Çeşmesi üstünde bir bâb çörekçi dükkânı derûnunda mevcûde gedik ta‘bîr olunur üç yüz elli vakıyye bakır tâbe ve tebsi ve sâir âlât-ı lâzıme-i ma‘lûmemin nısf-ı şâyi‘ini tarafeynden îcâb ve kabûlü hâvî şürût-ı müfside <> ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müşteri-i mezbûr Osman Çelebi’ye iki bin guruşa bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabz ü kabûl ettikden sonra semeni olan meblağ-ı mezkûr iki bin guruşu mezbûr Osman Çelebi yedinden bi’t-tamam ahz ü kabz edip bey‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve kâffe-i mutâlebâtdan mezbûr Osman Çelebi’nin zimmetini ibrâ-i âm ile ibrâ ve ıskāt eylediğimde, ol dahi ibrâ-i mezkûru kabûl edip ba‘de’l-yevm zikrolunan nısf-ı âlât-ı lâzıme-i ma‘lûmede benim asla ve kat‘â alâka ve medhalim kalmayup müşteri-i mezbûr Osman Çelebi’nin mülk-i müşterâsı ve hakk-ı sırfı olmuşdur, keyfe mâ yeşâ’ ve hasbe-mâ-yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb ve imlâ olundu. [37b] Fî 23 min-Rebî‘ülâhir sene [1]194. Şuhûdü’l-hâl: es-Seyyid Molla Ahmed b. Salih, Uncular Kethudâsı Mustafa Ağa b. el-Hâc Ahmed, es-Seyyid Mehmed Sâdık b. el-Hâc Mustafa, Mehmed Ağa b. Ahmed, el-Hâc Ahmed Ağa b. Hüseyin, Yiğitbaşı Halil Usta, Kâtib Süleyman Efendi, es-Seyyid İsmail b. Hüseyin, Hocapaşalı Küçük Ahmed.