İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 162 Hüküm no: 131 Orijinal metin no: [38a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâbık Baltacılar Kethudası Süleyman Ağa b. Ali Ağa’nın Kadırga Çadırcı Ahmed Mahallesi’ndeki menzilhane ve müştemilatı binalarının nısfını Esma Sultan’a iki bin guruşa satıp arsasının nısfını devrettiği Mübâya‘a-i nısf-ı şâyi‘a [i-menzil] Sarây-ı atik-i sultânî’de sâbıkā teberdârlar kethudâsı olan mefharu’l-emâsil ve’l-akrân es-Seyyid el-Hâc Süleyman Ağa b. el-Hâc Ali Ağa nâm kimesne meclis-i şer‘-i şerîf-i enver ve mahfil-i dîn-i münîf-i ezherde revnak-efzâ-yı serîr-i iffet ve mesned-ârâ-yı erîke-i nüzhet sultânü’l-muhadderât tâcü’l-müvekkarât aliyyetü’z-zât safiyyetü’s-sıfât ismetlü iffetlü inâyetlü Esma Sultân ‒dâmet ismetuhâ ve istekarret iffetuhâ‒ hazretlerinin kethudâ-yı âlî-kadrleri sa‘âdetlü semâhatlü mekremetlü Mehmed Efendi hazretlerinin kerîme-i muhteremeleri fahrü’l-muhadderât bâ‘isetü’l-kitâbi’l-müstetâb Âişe Hanım tarafından zikri [âtî] husûsu tasdîka vekîlleri olduğu el-Hâc Musa b. Hakverdi ve Receb Ağa b. Ahmed nâm kimesneler şehâdetleriyle sâbit olan Mehmed Ağa b. Abdurrahman nâm kimesne mahzarında ikrâr-ı sahîh-i şer‘î ve i‘tirâf-ı sarîh-i mer‘î edip arsası Behram Çavuş Vakfı’na senede bin yüz altmış akçe ve Ali Efendi Vakfı’na yedi yüz yirmi akçe mukāta‘a-i kadîme ile taht-ı tasarrufumda ve üzerinde kâin bi’l-cümle ebniyesi bir kıt‘a mübâya‘a hücceti nâtıka olduğu üzere akd-i âtî sudûruna değin yedimde mülk ve hakkım olup mahmiye-i İstanbul’da Kadırga Limanı kurbünde Çadırcı Ahmed Mahallesi’nde vâki‘ bir tarafdan ba‘zan el-Hâc Ömer menzili ve ba‘zan mîrî bostan ve bir tarafdan ba‘zan Behram Çavuş Câmi‘-i şerîfi ve ba‘zan Ahmed Bey menzili ve bir tarafdan imâm meşrûtası sagīr menzil ve bir tarafdan tarîk-i hâs ile mahdûd hâriciyede fevkānî ve tahtânî üç bâb oda ve bir sofa ve dîvânhâne ve tahte’s-semâ ve ahur ve havlu ve mârrü’l-beyân mîrî bostanına açılur bir kapu ve dâhiliyede fevkānî ve tahtânî dört oda ve tahta-pûş ve kiler ve bir kârgir hamam ve matbah ve câmekân ve eşcâr-ı müsmire ve gayr-ı müsmireli bağçe ve derûnunda bir bi’r-i mâ’ [38b] ve bir ekmek fırını ve etrâf-ı erba‘adan taş dîvâr ve müştemilât-ı sâire-i ma‘lûmeyi hâvî bir bâb menzilin ebniye-i memlûke-i mezkûresinin nısf-ı şâyi‘ini bi-cümletin mâ-yeştemiluhû ve yahvîhi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile iki bin guruşa müvekkile-i mûmâ-ileyhâ Âişe Hanım’a bey‘ ve temlîk ve arsa-i merkūmesinin nısf-ı şâyi‘ini dahi mütevellîleri ma‘rifetleriyle ferâğ ve tefvîz ve teslîm eylediğimde, onlar dahi ber-vech-i muharrer iştirâ ve temellük ve tefevvüz ve tesellüm ve kabûl eyledikden sonra semeni olan meblağ-ı mezkûr iki bin [guruşu] müvekkile-i mûmâ-ileyhâ yedlerinden tamamen ve kâmilen ahz ve kabz edip bey‘-i mezkûrun tağrîr ve gabnine müte‘allika âmme-i de‘âvî ve kâffe-i mutâlebâtdan her birimiz âharın zimmetini ibrâ-i âm ile bi’l-asâle ve bi’l-vekâle ibrâ ve ıskāt ve herbirimiz ber-vech-i muharrer âharın ibrâsını kabûl eyledik. Ba‘de’l-yevm menzil-i mahdûd-ı mezkûrun nısf-ı şâyi‘inde benim asla ve kat‘â alâka ve medhalim kalmayup menzil-i mahdûd-ı mezkûr[un] nısf-ı ebniye-i memlûkesi müvekkile-i mûmâ-ileyhâ Âişe Hanım’ın mülk-i müşterâsı ve arsa-i merkūmesi dâhil-i havza-i tasarrufu olmuşdur, keyfe mâ teşâ’ ve hasbe mâ tahtâr mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 9 min-Rebî‘ülâhir sene [1]194. Şuhûdü’l-hâl: Şâhidûne’s-sâbıkūn.