İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 163 Hüküm no: 132 Orijinal metin no: [38b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Yiğitbaşı Ahmed b. Mehmed’in vârisi kardeşi Hatice Hatun’un terekenin üçte birinin vasîsi Hasan b. Abdullah ile dört yüz guruşa sulh olduğu ve ibralaştıkları Vasî-i sülüs da‘vâsından verese ile sulh Âsitâne-i aliyye’de vâki‘ habbâzân esnâfının yiğitbaşısı olup bundan akdem tarîk-i Hâcc-ı şerîfde fevt olan el-Hâc Ahmed b. Mehmed’in verâseti li-ebeveyn kız karındaşı bâ‘ise[tü’]l-kitâb Hadîce Hatun’a inhisârı tahakkukundan sonra müteveffâ-yı mezbûrun vasî-i muhtârı olan el-Hâc Hasan b. Abdullah nâm kimesne meclis-i şer‘-i hatîr-i lâzımü’t-tevkīrde mezbûre Hadîce Hatun mahzarında ikrâr-ı tâm ve takrîr-i kelâm edip müteveffâ-yı mezbûr el-Hâc Ahmed hâl-i hayat ve kemâl-i akl ve sıhhatinde beni vasî-i muhtâr nasb ve ihtiyâr ettikde, bi-emrillâhi te‘âlâ vefât eylediğinde tarîk-i Hâcc-ı şerîfde ve İstanbul’da ve zimem-i nâsda olan cemî‘ terekesi tahrîr ve techîz ve tekfîn ve düyûn-ı müsbetem ba‘de’l-edâ fazlasının sülüsünü bana vasiyet edip musırrân fevt oldukda, tarîk-i Hâcc-ı şerîfde olan terekesinden ba‘de’l-ihrâci’l-mesârif bâkī kalan beş yüz kırk iki guruş ve İstanbul’da olan sermâye ve fâide ve değirmen gediği âlâtı ve eşyâ-i sâiresi dahi bin altı yüz seksen sekiz guruş tahmîn olunup iki bin iki yüz otuz guruşa bâliğ olmağla, meblağ-ı mezkûrun sülüsü olan yedi yüz kırk üç guruş kırk akçeyi mezbûre Hadîce Hatun’dan bi’l-vesâye taleb ve da‘vâ sadedinde olduğumda, ol dahi ba‘de’l-inkâr beynimizde münâza‘ât-ı kesîre ve muhâsamât-ı vefîre vâkı‘a olmuşidi. El-hâletü-hâzihî da‘vâ-yı mezkûremden [beni] dört yüz guruş üzerine ba‘de akdi’l-musâlaha ve’l-kabûl meblağ-ı mezkûr dört yüz guruşu mezbûre Hadîce Hatun bana def‘ ü teslîm [ve] ben dahi ber-vech-i muharrer yedinden bi’t-tamam ve’l-kemâl ahz ü kabz edip mâ‘adâsına ve sâire müte‘allika âmme-i de‘âvî ve mutâlebât ve kâffe-i eymân ve muhâsamâtdan mezbûre Hadîce Hatun’un zimmetini ibrâ-i âm ile ibrâ ve ıskāt mezbûre Hadîce Hatun dahi bana medfû‘u olan bedel-i sulh-i mezkûr dört yüz guruşa ve sâir[e] müte‘allika [39a] âmme-i de‘âvî ve mutâlebât ve kâffe-i eymân ve muhâsamâtdan kezâlik benim zimmetimi ibrâ-i âm ile ibrâ ve ıskāt ve her birimiz âharın ber-vech-i muharrer ibrâsını kabûl eyledik dedikde gıbbe’t-tasdîkı’ş-şer‘î mâ-hüve’l-vâki‘ bi’l-ibtigā sebt ü imlâ olundu. Fî 24 min-Rebî‘ülâhir sene 1194. Şuhûdü’l-hâl: el-Hâc Ahmed Ağa, Karamanlı Çörekçi el-Hâc Abdullah, es-Seyyid el-Hâc Emrullah Ağa, Kapan’da Çörekçi el-Hâc Ahmed b. Mustafa, es-Seyyid Mehmed Emin Yiğitbaşı, es-Seyyid Molla Ahmed b. es-Seyyid Salih.