İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 190 Hüküm no: 161 Orijinal metin no: [47a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safâyî bt. Abdullah’ın Atik Darbhane yakınındaki bakkal dükkânı on beş hissesini Hristo v. Yani’ye iki yüz altmış guruşa sattığı Bakkāl Mahmiye-i İstanbul’da Hâfız Paşa Câmi‘-i şerîfi kurbünde Mi‘mâr Sinan Mahallesi sâkinelerinden zâtı ta‘rîf-i şer‘î ile mu‘arrefe olan Safâyî bt. Abdullah nâm hatun meclis-i şer‘-i şerîf-i enverde bakkāl tâifesinden bâ‘isü’s-sifr Hristo v. Yani muvâcehesinde ikrâr-ı tâm ve takrîr-i kelâm edip mahmiye-i mezbûrede Darbhâne-i atîk kurbünde vâki‘ el-Hâc Yusuf dükkânı demekle ma‘rûf yüz yirmi sehim i‘tibâr olunan bir bâb bakkāl dükkânı derûnunda mevcûde beyne’l-hiref gedik ta‘bîr olunur ber-mûceb-i defter-i müfredât âlât-ı lâzıme-i ma‘lûmeden mutasarrıfe olduğum on beş sehim hisse-i şâyi‘amı tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mesfûr Hristo zimmîye iki yüz altmış altı guruşa bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabz ve kabûl etmekle, semeni olan meblağ-ı mezkûr iki yüz altmış altı guruşu müşteri-i mesfûr Hristo zimmî yedinden bi’t-tamam ahz ü kabz edip bey‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve kâffe-i mutâlebâtdan mesfûr Hristo zimmînin zimmetini ibrâ-ı âm ile ibrâ ve ıskāt eylediğimde, ol dahi ibrâ-i mezkûru ba‘de’l-kabûl zikrolunan on beş sehim âlât-ı lâzıme-i ma‘lûmede benim asla ve kat‘â alâka ve medhalim kalmayup müşteri-i mesfûr Hristo zimmînin mülk-i müşterâsı ve hakk-ı sırfı olmuşdur, keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 28 min-Cumâdelâhire sene [11]94. Şuhûdü’l-hâl: Pazarbaşı İbrahim Ağa, Molla İsmail b. Ali, Bölükbaşı Molla Halil b. İsmail, Hasan Bölükbaşı b. İbrahim.