İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 190 Hüküm no: 162 Orijinal metin no: [47a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İskohi bt. Avanes’e ölen kızından kalan yüz kırk guruş terekeyi damadı Bedros v. Serkiz’in teslim edip ibralaştıkları Mahrûse-i Galata’ya muzâfe kasaba-i Beşiktaş’a tâbi‘ Ortaköy karyesi mütemekkinelerinden İskohi bt. Avanes Nasrâniye tarafından husûs-ı âti’z-zikri ikrâra vekîl olduğu şahs-ı mesfûreyi bi’l-ma‘rifeti’ş-şer‘iyye ârifân olan Mustafa Ağa b. Ahmed ve Vartan v. Tomas şehâdetleriyle sâbit olan Bedros v. Begoz nâm zimmî meclis-i şer‘-i hatîr-i lâzımü’t-tevkīrde müvekkile-i mesfûre İskohi Nasrâniyenin sâbıkā dâmadı [ve] zikri âtî terekeye bi’l-verâse vaz‘-ı yedi mütehakkık olan Bedros v. Serkiz nâm zimmî muvâcehesinde bi’l-vekâle ikrâr-ı tâm ve takrîr-i kelâm edip müvekkilem mesfûre İskohi Nasrâniyeye kızı hâlike olan Maryem Nasrâniyeden bi’l-irsi’ş-şer‘î isâbet ve intikāl eden yüz kırk guruş hisse-i irsiye-i şer‘iyyesini mesfûr Bedros zimmî kayınatası müvekkile-i mesfûre İskohi Nasrâniyeye def‘ ve teslîm, ol dahi yedinden bi’t-tamam ve’l-kemâl ahz ü kabz ve istifâ edip ba‘de’l-yevm tereke-i hâlike-i mesfûreden zevci mesfûr Bedros zimmetinde bir akçe ve bir habbe asla hakkı bâkī kalmayup husûs-ı mezkûreye müte‘allika âmme-i de‘âvî ve mutâlebât ve kâffe-i eymân ve muhâsamâtdan mesfûr Bedros zimmînin zimmetini ibrâ-i âm ile ibrâ ve ıskāt, ol dahi kezâlik husûs-ı mezkûra müte‘allika âmme-i de‘âvî ve kâffe-i mutâlebâtdan kayınatası müvekkilem mesfûrenin zimmetini ibrâ-i âm ile ibrâ ve ıskāt ve her biri âharın ber-vech-i muharrer ibrâsını kabûl eyledi dediğini mesfûr Bedros zimmî tasdîk etmeğin mâ-vaka‘a bi’t-taleb ketb olundu. Fî 27 C sene [11]94. Şuhûdü’l-hâl: el-Hâc Ahmed Ağa, Yiğitbaşı es-Seyyid Mehmed Emin Ağa, es-Seyyid Mehmed Said Ağa, Mikail v. İstefan, Vartan v. Tomas, Serkiz v. Aleksan.