İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 233 Hüküm no: 211 Orijinal metin no: [63a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm Hatun bt. İbrahim’e Zindankapısı’ndaki Canbaziye Vakfı’na ait handaki vasîyesi olduğu küçük kızı Hafize’nin hissesini müzayede ile satmasına izin verildiği Mahrûse-i Galata’ya muzâfe İstinye nâhiyesine tâbi‘ Sarıyar karyesi sükkânından iken bundan akdem fevt olan Halil Ağa b. Abdullah’ın sulbiye sagīre kızı Hafîze’nin anası ve cânib-i şer‘den mansûbe vasîsi olan Ümmügülsüm Hatun bt. el-Hâc İbrahim meclis-i şer‘-i hatîr-i lâzımü’t-tevkīrde ikrâr-ı tâm ve takrîr-i kelâm edip İstanbul’da Zindânkapısı dâhilinde vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât Canbaziye Vakfı’ndan dört sehim i‘tibâriyle bir bâb tahta hânın üç sehmi mezbûr Halil Ağa’nın ile’l-vefât tasarrufunda olup ba‘de vefâtihî iki sehmi kebîre kızları Nefise ve Sâliha’ya ve bir sehmi intikāl-i âdî ile vasîsi olduğum kızım sagīre-i mezbûre Hafîze’ye intikāl edip lâkin hân-ı mezkûr ahşâbdan ve harâba müşrif ve hâsılı harcına vefâ etmeyüp şâyi‘an bekāsı sagīre-i mezbûre Hafîze’ye muzırr olmağla, hisse-i mezkûre bi’l-izni’ş-şer‘î ve bâ-ma‘rifet-i mütevellî ba‘de’l-müzâyede ve inkıtâ‘i’r-rağbe bedel-i misli ile âhara ferâğ ve bedeli istirbâh ve istiğlâl olunmak sagīre-i mezbûre hakkında enfa‘ olmağın hisse-i mezkûreyi ber-minvâl-i muharrer âhara ferâğa kıbel-i şer‘den bi’l-vesâye me’zûn olmak matlûbumdur dedikde vasî[yye]-i mezbûr[en]in bi’l-cümle kelimât-ı meşrûhası vâkı‘a mutâbık idüği zeyl-i kitâbda muharrrerü’l-esâmî Müslimîn haberleriyle lede’ş-şer‘i’l-enver zâhir ve mukarrer olmağın, hâkim-i muvakki‘-i sadr-ı kitâb bi-tevkī‘ihi’r-refî‘ü’l-müstetâb ‒tûbâ-lehû ve hüsnü-meâb‒ efendi hazretleri sehm-i mezkûru ber-minvâl-i muharrer bedel-i misli ve bâ-ma‘rifet-i mütevellî ile âhara ferâğa vasiyye-i mezbûre Ümmügülsüm Hatun’a izin verilmeğin mâ-vaka‘a bi’t-taleb ketb olundu. Hurrire fi’l-yevmi’r-râbi‘ min-Ramazani’l-mübârek li-sene erba‘a ve tis‘în ve mie ve elf. Şuhûdü’l-hâl: Mehmed Emin Efendi, Mehmed Ağa, Veliyüddin, es-Seyyid Mehmed Sâdık, Molla Mustafa.