İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 233 Hüküm no: 210 Orijinal metin no: [62b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çörekçi Menahim v. Yasef’in Mahmud Paşa Çarşısı’ndaki çörekçi fırını gediğini İsmail b. Hasan’a sekiz yüz on dört guruşa sattığı Çörekçi Çörekçi tâifesinden Menahim v. Yasef nâm Yahûdî meclis-i şer‘-i hatîr-i lâzımü’t-tevkīrde çörekçi tâifesinden es-Seyyid İsmail b. el-Hâc Hasan nâm kimesne mahzarında ikrâr-ı tâm ve takrîr-i kelâm edip İstanbul’da Mahmud Paşa çarşusının aşağı başında vâki‘ mutasarrıf olduğum bir bâb çörekçi fırını derûnunda beyne’l-esnâf gedik ta‘bîr olunur âlât-ı lâzıme-i ma‘lûmemi tarafeynden îcâb ve kabûlü hâvî şûrût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mezbûr es-Seyyid İsmail’e sekiz yüz on dört guruşa bey‘ ü temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabz ü kabûl ettikden sonra semeni olan meblağ-ı mezkûr sekiz yüz on dört guruşu mezbûr es-Seyyid İsmail yedinden bi’t-tamam ve’l-kemâl ahz ü kabz edip bey‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve kâffe-i mutâlebâtdan mezbûr es-Seyyid İsmail’in zimmetini ibrâ-i âm ile ibrâ ve ıskāt edip fîmâ-ba‘d zikrolunan âlât-ı lâzıme-i ma‘lûmede benim asla ve kat‘â alâka ve medhalim kalmayup müşteri-i mezbûr es-Seyyid İsmail’in mülk-i müşterâsı ve hakk-ı sırfı olmuşdur, keyfe mâ yeşâ’ ve yahtâr mutasarrıf [63a] olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 28 min-Şa‘bân sene [1]194. Şuhûdü’l-hâl: Çörekçiler Kethudâsı Osman Ağa, İsmail Çelebi, Kebabcı el-Hâc Mehmed, Osman Çelebi.