İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 235 Hüküm no: 213 Orijinal metin no: [63b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Dikici Danik v. Avanes’in yedi yüz elli guruşu, miktarlarını belirterek karısı, kızları ve torununa hîbe ettiği
Mahmiye-i İstanbul’da Edirne Kapısı dâhilinde Ka‘riye Câmi‘-i şerîfi Mahallesi mütemekkinlerinden ve dikici tâifesinden Danik v. Avanes nâm zimmî meclis-i şer‘-i hatîr-i lâzımü’t-tevkīrde sulbiye kebîre kızı Turan Nasrâniye ile zevcesi Kolorat bt. Kirkor ve Divriği kazâsı kurâlarından Kesme karyesinde mütemekkine hâlik olan oğlu Avanes zimmînin sulbiye kızı Maryem Nasrâniyelerin zikri âtî husûsu tasdîka vekîl-i şer‘îleri olup mesfûre Turan Nasrâniyenin zevci Mankasar v. Begos ve âhar kızı Ogide Nasrâniyenin zevci ve kezâlik zikri câ’î husûsu tasdîka vekîl-i şer‘îsi Parsih v. Agya muvâcehelerinde ikrâr-ı tâm ve takrîr-i kelâm edip hîbe-i âti’z-zikrin sudûruna değin yedimde mülküm olan cem‘an yedi yüz elli guruşun yüz elli guruşunu ifrâz ve zevcem mesfûre Kolorat Nasrâniyeye ve iki yüz elli guruşunu kızım mesfûre Turan Nasrâniyeye ve yüz guruşunu oğlum kızı mesfûre Maryem Nasrâniyeye ve iki yüz elli guruşunu âhar kızım mesfûre Ogide Nasrâniyeye hîbe-i sahîha-i şer‘iyye ile hîbe ve temlîk ve vekîlleri olup dâmadlarım olan mesfûrân Mankasar ve Parsih zimmîlere müvekkilleri mesfûrât içün teslîm eylediğimde, onlar dahi meclis-i hîbede ittihâb ve kabûl ve ber-vech-i muharrer kabz ve tesellüm eyleyüp fîmâ-ba‘d zikrolunan yedi yüz elli guruşda benim asla ve kat‘â alâka ve medhalim kalmayup mesfûrların minvâl-ı meşrûh üzere mülk-i mevhûbları ve hakk-ı sırfları olmuşdur dedikde vekîlân-ı mesfûrân ber-minvâl-i muharrer tasdîk ettiklerinden sonra mukırr-ı mesfûr Danik zimmî i‘âde-i kelâm edip emlâk-i eşyâ olmak üzere ancak on beş çift [64a] mest pâpûş ve iki boş dolab ve dört parça kitâb ve iki sahan ve bir yorgan ve bir kebe ve bir minder ve bir yasdık ile lâbis olduğum köhne libâsdan gayrı [ism-i] mâl ıtlâk olunur eşyâm yokdur deyüp mâ-vaka‘a bi’t-taleb ketb olundu. Fî 17 Ramazani’l-mübârek sene [1]194.
Şuhûdü’l-hâl: el-Hâc Ahmed b. Hüseyin, Memiş b. Hasan, İsmail Çelebi b. ( ), Osman Çelebi, Avanes v. Tomas, Bedros v. Begos, Attar Kerhat.
|