İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 236 Hüküm no: 214 Orijinal metin no: [64a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdi Bey b. Mustafa üzerine oğlu Ahmed için günlük otuz akçe nafaka takdir edildiği Mahmiye-i İstanbul’da Mollagürânî kurbünde Seydi Bey Mahallesi sâkinelerinden Emine bt. Mustafa nâm hatun meclis-i şer‘-i hatîr-i lâzımü’t-tevkīrde hâlâ Bursa’da mütemekkin zevc-i sâbıkı el-Hâc Abdi Bey b. Mustafa tarafından husûs-ı âti’z-zikri [tasdîka] vekîl olduğu Osman b. Ali ve es-Seyyid Mehmed b. Osman şehâdetleriyle sâbit olan Emânetci es-Seyyid İsmail b. Mustafa mahzarında takrîr-i kelâm ve ta‘bîr ani’l-merâm edip zevc-i sâbıkım mezbûr el-Hâc Abdi Bey’in firâşından hâsıl ve benden mütevellid ve bi-hakkı’l-hıdâne hacr ve terbiyemde olan sagīr oğlum Ahmed’in mâlı olmayup nafaka ve kisveye eşedd-i ihtiyâcı olmağla babası müvekkil-i mezbûr el-Hâc Abdi Bey üzerine kadr-ı ma‘rûf nafaka ve kisve-bahâ farz ve takdîr olunmak bi’l-hıdâne matlûbumdur dedikde vekîl-i mezbûr Emânetci es-Seyyid İsmail gıbbe’t-tasdîkı’ş-şer‘î işbu kitâb-ı anberîn-nikābı tevkī‘i-i refî‘-i müstetâbı ile tevşîh ve tezyîn eden hâkim-i câsim-i ma‘delet-nisâb ‒veffakallâhu te‘âlâ ilâ sebîli’s-savâb‒ efendi hazretleri sagīr-ı mezbûr Ahmed’in nafaka ve kisve-bahâsi’çün târih-i kitâbdan beher yevm otuzar akçe nafaka ve kisve-bahâ farz ve takdîr buyurup meblağ-ı mefrûz-ı mezkûru sagīr-i mezbûrun nafaka ve kisvesine harc ve sarfa ve lede’l-iktizâ istidâneye ve inde’z-zafer babası müvekkil-i mezbûr el-Hâc Abdi Bey üzerine rücû‘a vâlidesi mezbûre Emine Hatun’a izin verilmeğin mâ-vaka‘a bi’t-taleb ketb olundu. Fî 15 Ramazani’l-mübârek [sene 1194]. Şuhûdü’l-hâl: İsmail Çelebi b. Ali, Mehmed Ağa b. Ahmed Kethudâ-yı Muhzırân, İbrahim Çelebi.