İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 246 Hüküm no: 224 Orijinal metin no: [68a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Simitçi ve çörekçi Süleyman Beşe b. Hasan ve ortaklarının Mollahüsrev Camii karşısındaki simitçi ve çörekçi fırını gediğinin dört hissesini Helvacı Ali Usta b. Mehmed’e elli beş guruşa sattıkları Çörekçi Simidci ve çörekçi tâifesinden Süleyman Beşe b. Hasan ve Bayram Beşe b. Ahmed ve diğer Bayram Beşe b. Ali ve el-Hâc Mehmed b. İbrahim nâm kimesneler meclis-i şer‘-i hatîr-i lâzımü’t-tevkīrde zikri âtî bir bâb simidci ve çörekçi fırınının mülküne mutasarrıf olan bâ‘isü’l-kitâb Helvâcı Ali Usta b. Mehmed nâm kimesne mahzarında her biri ikrâr-ı tâm ve takrîr-i kelâm edip işbu akd-i âti’z-zikrin sudûruna değin altı sehim i‘tibâr olunup Küçük çarşusında Mollahüsrev Câmi‘-i şerîfi karşusunda vâki‘ bir bâb simidci ve çörekçi fırınının derûnunda mevcûde beyne’l-hiref gedik ta‘bîr olunur âlât-ı lâzıme-i ma‘lûmeden her birimiz mutasarrıf olduğumuz birer sehim hisse-i şâyi‘amızı tarafeynden îcâb ve kabûlü hâvî şûrût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mezbûr Helvâcı Ali Usta’ya elli beş guruşa bey‘ ve temlîk ve teslîm eylediğimizde, ol dahi ber-vech-i muharrer iştirâ ve temellük ve tesellüm ve kabz ü kabûl ettikden sonra semeni olan meblağ-ı mezkûr elli beş guruşu fırını mezbûr icâresinden mezbûr Ali Usta’ya zimmetimizde deynimiz olan elli beş guruşa takās ve mahsûb eylediğimizde, ol dahi ber-vech-i meşrûh mukāssa ve kabûl edip âlât-ı mezkûrenin tağrîr ve gabnine ve gedik husûsuna müte‘allika âmme-i de‘âvî ve mutâlebât ve kâffe-i eymân ve muhâsamâtdan mezbûr Ali Usta’nın zimmetini ibrâ-i âm ile ibrâ ve ıskāt eylediğimizde, ol dahi ibrâ-i mezkûru ba‘de’l-kabûl zikrolunan altı sehim i‘tibâriyle mutasarrıf olduğumuz dört sehim âlât-ı ma‘lûmede bizim asla ve kat‘â alâka ve medhalimiz kalmayup müşteri-i mezbûr Ali Usta’nın mülk-i müşterâsı ve hakk-ı sırfı olmuşdur, keyfe mâ yeşâ’ ve hasbe-mâ-yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 25 min-Şevvali’l-mükerrem sene [1]194. Şuhûdü’l-hâl: Mehmed Ağa b. Ahmed, Mustafa Ağa b. Abdullah, es-Seyyid Mehmed Sâdık.