İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 245 Hüküm no: 223 Orijinal metin no: [67b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Agis bt. Oskihan’ın ırsen intikal eden hisseler davasında Aleksan v. Kalos’dan sulhen iki yüz kırk guruş alıp ibralaştıkları Habbâz tâifesinden olup bundan akdem hâlik olan Hamparsom v. Oskihan zimmînin verâseti zevcesi Agis bt. Oskihan Nasrâniye ile kebîre kızları Nükat ve Agis ve Oskek Nasrâniyelere inhisârı tahakkukundan sonra mesfûre Agis Nasrâniyenin zevci ve tarafından husûs-ı âtiyyü’z-zikrde vekîl olduğu şahs-ı mesfûreyi ârifân Zarok v. Arakil ve Ezirker v. Avanes nâm zimmîler şehâdetleriyle sâbit olan Serkiz v. Toros nâm zimmî meclis-i şer‘-i hatîr-i lâzımü’t-tevkīrde hâlik-i mesfûrun şerîki işbu bâ‘isü’s-sifr Aleksan v. Kalos muvâcehesinde bi’l-vekâle ikrâr-ı tâm ve takrîr-i kelâm edip müvekkile-i mesfûre Agis Nasrâniyenin mûrisi hâlik-i mesfûrun İstanbul’da Odabaşı çarşusunda vâki‘ bir bâb ekmekçi fırını ve ona merbût ittisâlinde kâin yirmi sehim i‘tibâr olunur beş horoslu ekmekçi dükkânında mutasarrıf olduğu beş re’s bargir ve bir ayak ve civârında vâki‘ sekiz sehim i‘tibâr olunur iki horoslu uncu değirmeninde mutasarrıf olduğu ma‘lûmü’l-mikdâr bargirin ameliyle hâsıla olan fâide ve sermâyede olan hissesinden müvekkile-i mesfûre Agis Nasrâniyenin hisse-i irsiyesiyle vilâyetde olan emlâkden hisse-i irsiyesini bi’l-vekâle taleb ve da‘vâ sadedinde olduğumda, ol dahi inkâr etmekle beynimizde münâza‘ât-ı kesîre ve muhâsemât-ı vefîre vâkı‘a olmuşidi. El-hâletü-hâzihî beynimize muslihûn tavassut edip beni da‘vâ-yı mezkûremden iki yüz kırk guruş üzerine ba‘de akdi’l-musâlaha ve’l-kabûl mâ‘adâsına ve vilâyetde olan menzil ve bağ ve bağçe ve emlâk-i sâireden hisse mutâlebesine ve işbu târih-i kitâba gelince bi’l-cümle hukūk-ı ma‘lûme ve mechûleye müte‘allika âmme-i de‘âvî ve mutâlebât ve kâffe-i eymân ve muhâsemâtdan mesfûr Aleksan zimmînin bi’l-vekâle zimmetini ibrâ-i âmm-ı <> kātı‘ü’n-nizâ‘ ve ıskāt-ı tâmm-ı râfi‘ü’l-hısâm ile ibrâ ve ıskāt eylediğimde, ol dahi ber-vech-i muharrer ibrâ-i [68a] mezkûru kabûl eyledi dediğini mesfûr Aleksan tasdîk etmeğin mâ-vaka‘a bi’t-taleb ketb olundu. Fî 27 min-Şevvali’l-mükerrem sene [1]194. Şuhûdü’l-hâl: el-Hâc Ahmed Ağa b. ( ), Uncular Kethudâsı Mustafa Ağa, Yiğitbaşı es-Seyyid Mehmed Emin, Bedros v. Begos, Vartan v. Tomas, Mikail v. İstefan, Serkiz v. Aleksan.