İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 247 Hüküm no: 226 Orijinal metin no: [68b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Nezaret v. Aranos’un vârislerinin Hocapaşa’daki uncu değirmeni hisseleri davasında Asvador v. Serkiz’den sulhen yüz elli guruş alıp ibralaştıkları
Habbâz tâifesinden olup bundan akdem hâlik olan Nezaret v. Aranos zimmînin verâseti zevcesi Marta bt. Serkiz ile sulbî kebîr oğulları Avanes ve Aranos ve sulbiye kebîre kızı Turfanda Nasrâniye[ye] inhisârı tahakkukundan sonra mesfûr Aranos zimmî meclis-i şer‘-i hatîr-i lâzımü’t-tevkīrde hâlik-i mesfûrun şerîki bâ‘isü’s-sifr Asvador v. Serkiz nâm zimmî muvâcehesinde ikrâr-ı tâm ve takrîr-i kelâm edip mûrisimiz hâlik-i mesfûrun İstanbul’da Hocapaşa’da vâki‘ on altı sehim i‘tibâr olunan dört horoslu bir bâb uncu değirmeninde olan re’s-i mâl ve fâidesine ve değirmen-i mezkûrun [gedik] ta‘bîr olunur on altı re’s bargirden mutasarrıf olduğu dört re’s bargir ve sâir âlât-ı lâzıme-i ma‘lûmesine ve hâlik-i mesfûr[un] düyûn-ı müsbetesi’çün bey‘ olunan âlât-ı mezbûrenin tağrîr ve gabnine müte‘allika da‘vâ sadedinde olduğumda, ol dahi inkâr etmekle beynimizde münâza‘ât-ı kesîre ve muhâsemât-ı vefîre vâkı‘a olmuşidi. El-hâletü-hâzihî beynimize muslihûn tavassut edip beni da‘vâ-yı mezkûremden yüz elli guruş üzerine ba‘de akdi’l-musâlaha ve’l-kabûl husûs-ı mezkûra ve sâir beynimizde cereyân eden bi’l-cümle hukūk-ı ma‘lûme ve mechûleye müte‘allika âmme-i de‘âvî ve mutâlebât ve kâffe-i eymân ve muhâsemâtdan mesfûr Asvador zimmî ile âhar şerîki gāib ani’l-meclis İsmail b. Abdullah’dan her birinin zimmetini ibrâ-i âmm-ı kātı‘ü’n-nizâ‘ ve ıskāt-ı tâmm-ı râfi‘ü’l-hısâm ile ibrâ ve ıskāt eylediğimde, ol dahi ibrâ-i mezkûru kabûl eyledi dediğini mesfûr Asvador zimmî tasdîk etmeğin mâ-vaka‘a bi’t-taleb ketb olundu.
Fî 27 min-Şevval sene [1]194.
Şuhûdü’l-hâl: Habbâzân Kethudâsı Mustafa Ağa, Uncular Kethudâsı Mustafa Ağa, el-Hâc Ahmed b. Hüseyin, Yiğitbaşı es-Seyyid Mehmed Emin, es-Seyyid Mehmed Said.
|