İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 248 Hüküm no: 227 Orijinal metin no: [68b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Ağa b. Hüseyin’in Ahî Çelebi Vakfı’na ait Yemiş İskelesi’ndeki bakkal dükkânı hisselerinden el çektiği ve gediğinin nısfını İbrahim Beşe b. Mehmed’e üç yüz yirmi guruşa sattığı Bakkāl Mahmiye-i İstanbul’da ( ) Mahallesi sükkânından İsmail Ağa b. el-Hâc Hüseyin nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb İbrahim Beşe b. Mehmed nâm kimesne mahzarında ikrâr-ı tâm ve takrîr-i kelâm edip İstanbul’da merhûm Ahî Çelebi Vakfı’ndan olup kırk sehim i‘tibâriyle Yemiş iskelesinde vâki‘ Yoğurtçular zukāğı başında kâin bir bâb bakkāl dükkânından bi’l-icâreteyn mutasarrıf olduğum yirmi sekiz sehim hisse-i şâyi‘amı bâ-re’y-i mütevellî mezbûr İbrahim Beşe’ye bedel-i ma‘lûm ve makbûz mukābelesinde ferâğ-ı mu‘teber-i kat‘î ile ferâğ ve tefvîz eylediğimde, ol dahi [69a] ber-vech-i muharrer tefevvüz ve kabûl ettikden sonra derûnunda mevcûde beyne’l-hiref gedik ta‘bîr olunur âlât-ı lâzıme-i ma‘lûmeden dahi mutasarrıf olduğum nısf hisse-i şâyi‘amı tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mezbûr İbrahim Beşe’ye üç yüz yirmi guruşa bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabz ü kabûl ettikden sonra semeni olan meblağ-ı mezbûr üç yüz yirmi guruşu mezbûr İbrahim Beşe yedinden bi’t-tamam ve’l-kemâl ahz ve kabz edip bey‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve mutâlebât ve kâffe-i eymân ve muhâsamâtdan mezbûr İbrahim Beşe’nin zimmetini ibrâ-ı âm ile ibrâ ve ıskāt eylediğimde, ol dahi ibrâ-i mezkûru ba‘de’l-kabûl zikrolunan âlât-ı lâzıme-i ma‘lûmenin nısf-ı şâyi‘inde benim asla ve kat‘â alâka ve medhalim kalmayup mezbûr İbrahim Beşe’nin mülk-i müşterâsı ve yirmi sekiz sehim hisse-i mezkûre mülk-i müfevvezi olmuşdur, keyfe mâ yeşâ’ ve hasbe-mâ-yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 29 min-Şevval sene [11]94. Şuhûdü’l-hâl: <<Şâhidûne’s-sâbıkūn>> el-Hâc Ahmed b. Hüseyin, Kassâb İbrahim Beşe, el-Hâc Ahmed, Bostancı Mustafa Beşe, Yoğurtcu İbrahim Beşe.