İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 45 Hüküm no: 3 Orijinal metin no: [1b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Niko v. Kosta’nın kasab dükkanı gedik hisse ve aletlerini Çato v. Prako’ya sattığı Bismillâhirrahmanirrahîm Yâ Fettâh Yâ Rezzâk Yâ Kerîm Yâ Allâh Yâ Mu‘în Evkâf-ı hazret-i şehriyârîden Dördüncü ve Beşinci Selhhâne’ye merbût olup mahrûse-i Galata’ya muzâfa kasaba-i Tophâne’de vâki‘ Ada Gürcü dükkânı dimekle ma‘rûf bir bâb kasab dükkânı derûnunda mevcûd beyne’l-hıref gedik ta‘bîr olunur âlât-ı lâzıme-i ma‘lûmenin nısf-ı hisse-i şâyi‘asıyla Çavuşbaşı mahallesinde vâki‘ bir bâb kasab dükkânı gediğinin rub‘ hisse-i şâyi‘asına bâ-temessük-ı mütevellî mutasarrıf olan Nikola v. Kosta zimmî meclis-i şer‘-i kavîmde kasab tâ’ifesinden olup kasab ustalığı uhdesinden gelmeğe kādir idüği hâlâ Kasabbaşı Mehmed Emin Ağa tarafından vekîli kasablar kethüdâsı el-Hâc Ali Ağa ve ustalarından Mehmed Said Ağa ihbârlarıyla zâhir olan Çato v. Prako zimmî muvâcehesinde takrîr-i kelâm edip ber-vech-i muharrer iki bâb dükkânlar derûnlarında mutasarrıf olduğum nısf ve rub‘ âlât-ı lâzıme-i ma‘lûme hisselerimi hüsn-ı rızâ ve ihtiyârımla bedel-i ma‘lûm mukâbelesinde bâ-re’y-i mütevellî mesfûr Çato zimmîye ferâgat ve kasr-ı yed edip fîmâ ba‘d bâlâda zikr olunan iki bâb dükkânların nısf ve rub‘ gedik âlât-ı lâzımelerinde benim kat‘â alâka ve medhalim kalmayıp mersûm Çato zimmînin hakk-ı mufavvazı olmuşdur dedikde mesfûr Çato zimmî dahî tasdîk edip nısf ve rub‘ âlât-ı mezkûre hisseleri defter-i vakf-ı mersûm Çato zimmî üzerine kayd ve yedine müceddeden başka temessük i‘tâ olunmak ricâsında oldukları İstanbul Mahkemesi’nden huzûr-ı âlîlerine i‘lâm olundu. Fî 27 Zilhicce sene 1201 Derkenar: Mübâya‘a-i kasab