İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 46 Hüküm no: 4 Orijinal metin no: [1b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Liko v. Praşkova ile Kiro v. Kika’nın ortak oldukları kasab dükkanlarının gedik hisse ve aletlerini Koca v. Nako’ya sattığı Ma‘rûz Evkâf-ı hazret-i şehriyârîden Birinci Selhhâne’ye merbût mahrûse-i Galata’ya muzâfa kasaba-i Fındıklı’da vâki‘ bir bâb kasab dükkânı ile Onuncu Selhhâne’ye merbût mahrûse-i mezbûrda Beyoğlu’nda Ağa Hamamı kurbünde kâ’in bir bâb kasab dükkânları derûnlarında mevcûde beyne’l-hıref gedik ta‘bîr olunur âlât-ı lâzıme-i ma‘lûmelerinin bâ-temessük-ı mütevellî ale’l-iştirâki’s-sevî mutasarrıfân olan Liko v. Praşkova ve Kiro v. Kika nâm zimmîlerden her biri meclis-i şer‘-i kavîmde kasab ust5alağını idâreye kādir idüği hâlâ Kasabbaşı Mehmed Emin Ağa tarafından vekîli Kasablar Kethüdâsı el-Hâc Ali Ağa ve ustalarından Mehmed Said Ağa ihbârlarıyla zâhir olan Koca v. Nako zimmî muvâcehesinde takrîr-i kelâ edip mârrü’z-zikr iki bâb dükkânlarda ale’l-iştirâk mutasarrıf olduklarımız âlât-ı lâzıme-i ma‘lûme dahî hüsn-ı rızâ ve ihtiyârımız ile bedel-i ma‘lûm mukâbelesinde bâ-re’y-i mütevellî mersûm Koca zimmîye ferâgat ve kasr-ı yed edip fîmâ ba‘d âlât-ı mezkûrede bizim alâka ve medhalimiz kalmayıp mersûmun hakk-ı mufavvazı olmuşdur dediklerinde mersûm Koca dahî ba‘de’t-tasdîk mezkûr iki bâb dükkânlarda olan âlât-ı mezkûre defter-i vakfa mersûm Koca zimmî üzerine kayd birle yedine temessük i‘tâ olunmak ricâsında oldukları İstanbul Mahkemesi’nden huzûr-ı âlîlerine [2a] i‘lâm olundu el-emru li-men lehü’l-emr. Fî selh-i Zilhicceti’ş-şerîfe sene 1201. Derkenar: Mübâya‘a-i kasab