İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 83 Hüküm no: 49 Orijinal metin no: [12a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Berber esnafının, Du‘âcı Abdullah Halîfe’yi, ölen Yakup Halife’nin yerine şeyh tayin edilmesini talep ettikleri Ma‘rûz İstanbul’da Berber esnâfının kethüdâsı İdris Ağa b. Ahmed ve Yiğitbaşı Mehmed Sadık b. Abdülkerim ve çavuşları Salih b. Ali ve ustalarından el-Hâc Osman b. Ahmed ve Ömer b. Hüseyin ve es-Seyyid Abdullah b. Mehmed ve el-Hâc Ahmed b. Hüseyin ve es-Seyyid Mehmed b. es-Seyyid Mustafa ve Mustafa b. Mehmed ve Yahya b. Mehmed ve Mehmed Emin b. Mehmed ve es-Seyyid Ali b. el-Hâc Mehmed ve el-Hâc Mehmed b. Ahmed ve Ali b. Halil ve Ahmed b. İsmail ve Ali b. İbrahim ve es-Seyyid Numan b. es-Seyyid Ebubekir ve es-Seyyid Ali b. es-Seyyid Mustafa ve es-Seyyid Ömer b. es-Seyyid Halil ve Ali b. Ömer ve Mehmed b. Musa vesâ’ir mazbûtü’l-esâmî ustalar meclis-i şer‘-i kavîmde sâhib-i arzuhâl esnâf-ı mezbûre du‘âcısı Abdullah Halîfe b. Ahmed hâzır olduğu hâlde bâ-berât-ı âlîşân esnâfımıza bilâ ta‘yîn şeyh olan kimesne fevt oldukda meşîhati yine esnâfımızdan ve cümlemizin muhtârı olup du‘âcı bulunan kimesneye tevcîh olunmak öteden berû nizâm-ı mer‘iyyemizden olmağla bâ-berât-ı âlîşân esnâfımıza şeyh olan Yakub Halîfe b. Ali fevt olup ve mezbûr Abdullah dahî esnâfımızın du‘âcısı ve meşîhat-i mezkûreye vücûhla mahal ve müstehak ve cümlemizin muhtârıdır deyü her biri bi’l-ittifâk ihbâr ve iltimâs etmeleriyle meşîhat-i mezkûre merkûm Yakub Halîfe mahlûlünden esnâf-ı mezbûre ustalarının muhtârları olan mezbûr Du‘âcı Abdullah Halîfe’ye tevcîh ve yedine müceddeden berât-ı şerîf-i âlîşân inâyet ve ihsân buyurulmak ricâsına huzûr-ı âlîlerine i‘lâm olundu. Fî 19 Ra sene 1202. Derkenar: Tevcîh-i berber