İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 82 Hüküm no: 48 Orijinal metin no: [12a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mavna esnafının, nizamlarının başmuhasebeye kaydedilmesini talep ettikleri Ma‘rûz Sâdır olan fermân-ı âlîlerine imtisâlen ashâb-ı arzuhâl İstanbul’da Ayazmakapısı iskelesinde Mavnacılar Kethüdâsı Hasan Beşe b. Mehmed ve neferâtından Yiğitbaşı Halil b. Ali ve Yakub b. el-Hâc Ömer ve Mustafa b. Hasan vesâ’ir mazbûtü’l-esâmî mavnacılar ile Galata’da Azabkapısı iskelesinde mavnacılar kethüdâsı es-Seyyid Ahmed b. Salih ve Yiğitbaşısı Hasan b. Abdullah ve neferâtından Mustafa b. Mehmed ve Osman ve Mehmed vesâ’irleri meclis-i şer‘-i münîrde arzuhâlde mezkûr Odunkapısı iskelesi mavnacılar kethüdası Mehmed b. Ahmed ve Yiğitbaşıları Mehmed b. Mehmed ve Mavnacılarından Ömer b. Ahmed ve Hüseyin b. Hasan ve sâ’irleri muvâcehelerinde her biri takrîr-i kelâm edip öteden berû Tophâne-i âmire ve Cebehâne-i ma‘mûre ve Arabacıyan ocağı Bahr-ı siyâh boğazı kulağının ve mühimmât-ı sâ’ire hidemâtını yalnız bizler rü’yet ve idâre edip lâkin sefer-i hümâyûn vukû‘uyla hidemâtın kesretine binâ’en adamlarımızın kılleti olmağla bilâ i‘âne hidemât-ı pâdişâhîyeyi idâreye iktidârımız olmayıp ve mezkûr Odunkapısı iskelesi mavnacılarının hidemâtdan bir hizmete me’mûriyetleri olmamağla iktizâ eden hidemât-ı mîriyeyi ma‘an idâre etmek üzre bizlere ilhâk olunmaları murâdımızdır dediklerinde Odunkapısı mavnacıları dahî gerçi mezbûrûn hidemât-ı mezkûreyi edâ ve idâre ederler biz dahî mîrî ebniyenin kereste ve levâzım-ı sâ’iresini ve kılâ‘ın ebniyeleri mühimmâtını nakle ve harîkde ta‘yîn olunmamızla hidemât-ı pâdişâhîyeyi bu vecihle edâ ve idâre ederiz deyü cevâba tasaddî etmeleriyle beyinlerinde ba‘de’l-münâza‘a Odunkapısı iskelesi mavnacıları yalnız kereste nakline ve Ayazmakapısı ve Azabkapısı mavnacıları dahî Kapan-ı Dakîk iskelesinden zahîre nakline münhasırlar olmayıp iktizâ ettikçe kereste ve kapan iskelesinden zehâyir naklinden âharı men‘ etmeyip ve vukû‘ bulan hidemât-ı mîriyeyi mezkûr üç aded iskele mavnacıları ale’s-sevî edâ ve idâre etmek üzre her biri ta‘ahhüd ve bu vecihle kat‘-ı münâza‘a eylediklerinden sonra mavnacı esnâfı mezbûrûnun husûs-ı mezkûra dâ’ir senedleri olmamağla işbu şurût ve ta‘ahhüdleri başmuhâsebeye kayd ve ilâ mâşâallâhi te‘âlâ düstûrü’l-amel tutulmak üzre iskele-i selâse mavnacıları yedlerine tuğrâ-yı garrâ ile mu‘anven başka başka emr-i âlîşân i‘ta buyurulmak bâbında istid‘â eyledikleri huzûr-ı âlîlerine i‘lâm olundu. Fî 5 Rebî‘ü’l-evvel sene 1202.