İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 84 Hüküm no: 51 Orijinal metin no: [12b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eflak’tan gelen koyunların Beşiktaş’ta duruldurulmadan Üsküdar’a geçirilmesi ve esnafa dağıtılmasının talep edildiği Ma‘rûz Sâdır olan fermân-ı âlîlerine imtisâlen ashâb-ı arzuhâl Medîne-i Üsküdar’da kasab esnâfından mazbûtü’l-esâmî ustalar meclis-i şer‘-i kavîmde esnâf-ı mezbûre kethüdâsı el-Hâc Ali Ağa ve esnâf-ı mezbûre üzerlerine ta‘yîn olunan Yazıcı Mehmed Efendi hâzırân oldukları hâlde bundan akdem tevzî‘ ve bâ-izn-i âlî medîne-i mezbûreye mürûr eden ağnâm tanzîm olunan iki yüz on beşer re’si yevmiye üzere işbu şehr-i Rebî‘ü’l-evvel gâyetine değin vefâ edip lâkin tevzî‘lerden medîne-i mezbûreye mürûr edecek ağnâm Beşiktaş havâlîsinde tevkîf ile vâfir ağnâm telef ve zâyi‘ ve bizler küllî mütezarrır olacağımız zâhir ve husûs-ı mezbûr bir sûret-i müstahseneye rabta muhtâc olmağın gerek bu def‘a Eflâk cânibinden vürûd eden ağnâm ve gerek fîmâ ba‘d vürûd edecek ağnâm tevzî‘ olundukda hissemize isâbet eden ağnâmdan kethüdâmız mezbûr el-Hâc Ali Ağa’nın Beşiktaş subaşısına memhûr tezkiresiyle vürûd eden ağnâm bilâ tevakkuf ceste ceste mürûr ve her tevzî‘ hitâmında yine kethüdâ-yı mezbûr mürûr eden ağnâmın ilm u haber kâ’imesini İstanbul Mahkemesi’ne takdîm ve hîn-i iktizâda mürûr eden ağnâm ve mezbûhât ma‘lûm olmak içün tezkire ve kâ’imeler birbiriyle tatbîk olundukda hilâf-ı ta‘ahhüd hareketi zâhir olan te’dîb olunup işbu şurût düstûrü’l-amel tutulmak üzre bu def‘a Eflâk cânibinden vürûd eden ve fîmâ ba‘d vürûd edecek ağnâm tevzi‘lerinden hissemize isâbet eden mikdârı Beşiktaş’da tevkîf olunmaksızın ber vech-i muharrer ceste ceste mürûruna izn-i âlîlerini hâvî tuğrâ-yı garrâ ile mu‘anven emr-i âlîşân sudûru niyâzında oldukları huzûr-ı âlîlerine i‘lâm olundu. Fî 15 Ra sene 1202. Derkenar: Kasab