İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 85 Hüküm no: 52 Orijinal metin no: [12b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasab Kika ve Martin’in, Lefter, Panayot ve Dimo ile iftira, garez, mallara zarar verme gibi hususlardaki kavgalarında anlaştıkları Ma‘rûz Sâdır olan fermân-ı âlîlerine imtisâlen kasab tâ’ifesinden olup arzuhâl eden Kika v. Kostantin ve Martin v. Yorgi nâm zimmîler meclis-i şer‘-i kavîmde Kasablar Kethüdâsı el-Hâc Ali Ağa hâzır olduğu hâlde arzuhâlde isimleri mezkûr yine kasab tâ’ifesinden Lefter ve Panayot v. Kiko ve Dimo v. Nikola nâm zimmîler muvâcehelerinde mesfûrûnun bizlere garez ve nefsâniyetleri olmağla vezn-i lahm eylediğimiz ve râhımızı hufyeten devr-i (....?) ba‘dehû zâbıta ihbâr vesa’ir töhmet isnâdıyla gamz ve bizi tecrîm ettirdiklerinden mâ‘adâ medyûnumuz olanlardan biri fevt oldukda bizim haberimiz yoğiken bizim ismimizi zikr ile veresesiyle şey’-i kalîl üzerine sulh olup ve dâ’imâ helâkimizi kasd etmeleriyle mesfûrûndan bi’l-külliye emniyetimiz meslûbe olmuşdur deyü iştikâ eylediklerinde mesfûrûndan her biri külliyen inkâr etmeleriyle beyinlerinde ba‘de vukû‘i’l-münâza‘a bâ-vesâtat-ı muslıhîn tarafeynden her biri fîmâ ba‘d ırzlarıyla mukayyed olup âharın ırz ve mallarına kavlen ve fi‘len sû’-i kasd ve ızrâr etmemek üzre ta‘ahhüd ve eğer hilâf-ı ta‘ahhüd sû’-i kasd ve ızrâra tasaddî eder olur ise küreğe vaz‘ ile te’dîbe râzılar olup ve ber-vech-i muharrer ta‘ahhüdlerinin hilâf-ı hareket etmemek üzere mesfûr Lefter mersûmân Panayot ve Dimo zimmîlere ve mesfûr Kika zimmî dahî mersûm Martin zimmîye ve kethüdâ-yı mezbûr el-Hâc Ali Ağa dahî mesfûrân Lefter ve Kika zimmîlere kefîller olup bu vecihle bi’t-terâzî kat‘-ı münâza‘a eyledikleri huzûr-ı âlîlerine i‘lâm olundu. Fî 19 Rebî‘ü’l-evvel sene 1202. Derkenar: Kasab nizâ‘ı