İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 122 Hüküm no: 103 Orijinal metin no: [26b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Abdullah b. İsmail’in duhancı dükkanı gedik hisse ve aletlerini Mustafa b. el-Hâc Mehmed’e sattığı Ma‘rûz Ma‘den kaleminde mukayyed gediklerden mahrûse-i Galata’ya muzâfa kasaba-i Tophâne’de Firuz Ağa Câmii karşısında vâki‘ bir bâb duhancı dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin mutasarrıfı olup bundan akdem vefât eden Şişman Emir Ahmed b. es-Seyyid Mehmed’in terekesinden bâ-hüccet-i şer‘iyye nısf âlât-ı mezkûreyi iştirâ eden el-Hâc Abdullah b. İsmail nâm kimesne meclis-i şer‘-i münîrde duhancı esnâfının kethüdâsı İbrahim Ağa hâzır olduğu hâlde âlât-ı mezkûrenin nısf-ı âharını müteveffâ-yı mezbûrdan iştirâ ve mutasarrıf olan Mustafa b. el-Hâc Mehmed muvâcehesinde takrîr-i kelâm edip ber-vech-i muharrer mutasarrıf olduğum nısf âlât-ı mezkûremi yüz guruş semen-i makbûza mezbûr Mustafa’ya bâtten ve sahîhan bey‘ ve temlîk ve teslîm ol dahî ber-vech-i muharrer iştirâ ve tesellüm ve kabûl edip fîmâ ba‘d âlât-ı mezkûrede benim kat‘â alâka ve medhalim kalmayıp mecmû‘-ı mezbûr Mustafa’nın mülk-ı müşterâsı olmuşdur dediklerinde mezbûr Mustafa dahî tasdîk etmekle âlât-ı mezkûre kaydı müteveffâ-yı mezbûr üzerinden ref‘ ve merkûm Mustafa üzerine kayd birle yedine sûret i‘tâ olunmak niyâzında oldukları huzûr-ı âlîlerine i‘lâm olundu. Fî 22 min Cumâde’l-âhire sene 1202.