İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 121 Hüküm no: 102 Orijinal metin no: [26a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Beşe b. Ahmed’in kasap dükkanı gediği hisse ve aletlerini Feyzullah Usta b. Ahmed’e sattığı Ma‘rûz Hazret-i Ebâ Eyyûbe’l-Ensârî -radiyallâhu anhu Rabbühü’l-Bârî- câmi-i şerîfi evkâfından Medîne-i Eyüb selhhânelerinden Dördüncü Selhhâne’ye merbût olup medîne-i mezbûrede Çarşı-yı Kebîr’de çörekçi dükkânı karşısında vâki‘ Ada Dükkânı dimekle ma‘rûf bir bâb kasab dükkânı derûnunda mevcûde beyne’l-hıref gedik ta‘bîr olunur âlât-ı [26b] lâzıme-i ma‘lûmenin bâ-temessük-ı mütevellî mutasarrıfı Hüseyin Beşe b. Ahmed meclis-i şer‘-i münîrde medîne-i mezbûrede kassâbân esnâfının kethüdâları olup hâlâ Kasabbaşı Mehmed Emin Ağa tarafından vekîl olan Ebubekir Ağa hâzır olduğu hâlde esnâf-ı mezbûre yiğitbaşısı Feyzullah Usta b. Ahmed muvâcehesinde takrîr-i kelâm edip ber-vech-i muharrer mutasarrıf olduğum âlât-ı mezkûremi hüsn-ı rızâ ve ihtiyârımla bâ-re’y-i mütevellî bedel-i ma‘lûm mukâbelesinde mezbûr Feyzullah Usta’ya ferâgat ve kasr-ı yed edip fîmâ ba‘d âlât-ı mezkûrede benim kat‘â alâka ve medhalim kalmayıp mezbûr Feyzullah Usta’nın hakk-ı mufavvazı olmuşdur dedikde mezbûr Feyzullah Usta ba‘de’l-kabûl âlât-ı mezkûre mezbûr Hüseyin Beşe’nin ferâğ ve kasr-ı yedinden mezbûr Feyzullah Usta üzerine tahrîr ve defter-i vakfa kayd birle yedine temessük i‘tâ olunmak ricâsında oldukları İstanbul Mahkemesi’nden huzûr-ı âlîlerine i‘lâm olundu. Fî 17 min C. sene 1202.