İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 137 Hüküm no: 124 Orijinal metin no: [32b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rûz-ı Hızır’da kuzu kesilmesi ve satılmasına izin verilmesi Ma‘rûz Beher sene rûz-ı Hızır hulûlünde kuzunun zebh ve bey‘ine izn verilmek mu‘tâd olmağla hâssa kasabbaşı izzetlü Mehmed Emin Ağa kullarının sene-i sâbıka misillü bir vakıyye lahm-ı kuzuyu celebân tâ’ifesi dokuz pâreye kassâbâna kassâbân dahî birer pâre fâ’ide zammıyla onar paraya ibâdullâha bey‘ olunması içün emr-i âlîleri erzânî buyurulmak bâbında istid‘âsını hâvî dîvân-ı âlîye takdîm eylediği takrîri bâlâsına şeref-yâfte-i sudûr eden fermân-ı âlî mûcebince kassâbân tâ’ifesi bir vakıyye kuzu lahmını celebândan dokuz pâreye iştirâ ve işbu gelecek ahad günü rûz-ı Hızır olmağla yevm-i mezbûrda kuzu zebh ve birer pâre fâ’ide zammıyla onar pâreye ibâdullâha bey‘a kassâbân kethüdâsı ve ma‘lûmü’l-esâmî kasab ustaları ta‘ahhüd etmeleriyle yevm-i mezbûrda kuzu zebh ve ber-vech-i muharrer bey‘ etmek üzre izn-i âlîleri erzânî buyurulmak bâbında İstanbul Mahkemesi’nden huzûr-ı âlîlerine i‘lâm olundu. Fî 25 min Recebi’l-ferd sene 1202.