İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 137 Hüküm no: 123 Orijinal metin no: [32a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. el-Hâc Ali’nin yumurtacı, sabuncu ve mahzen gedik hisselerini İbrahim Beşe’ye sattığı, daha sonra satıştan vazgeçtiği ancak satışın iptalinin reddolunduğu Ma‘rûz Sâhibe-i arzuhâl İstanbul’da Sarı Timurhan mahallesi sâkinelerinden ma‘rifetü’z-zât Fatma bt. el-Hâc Ali nâm hatun meclis-i şer‘-i kavîmde arzuhâlde mezkûrü’l-ism Mehmed b. Ömer ile terâfu‘larında Odunkapısı hâricinde vâki‘ bir bâb yumurtacı ve bir bâb sabuncu dükkânları ve bir bâb mahzen derûnlarında mevcûde beyne’l-hıref gedik ta‘bîr olunur âlât-ı lâzıme-i ma‘lûmeleri kırk sekiz sehm i‘tibârıyla irsen yedimde mülk ve hakkım olan yirmi bir sehm hisse-i şâyi‘amı bin yüz doksan beş senesi Saferü’l-hayr’ın on altıncı günü tarafeynden bi’l-îcâb ve’l-kabûl şurût-ı müfsideden ârî bey‘-i bâtt-ı sahîh-i şer‘î ile huzûr-ı hâkimde zevcim işbu hâzır bi’l-meclis İbrahim Beşe’ye bin guruşa bey‘ ve temlîk ve teslîm ol dahî ber-vech-i muharrer iştirâ ve temellük ve tesellüm edip yedine hüccet-i şer‘iyye i‘tâ olundukdan sonra zevcim mezbûr İbrahim Beşe dahî yedinden iştirâ ve kabz eylediği mahzen-i mezkûrda olan yirmi bir sehm gedik âlâtını bin yüz doksan sekiz senesi Safer’i gurresinde beş yüz elli guruşa karındaşı mezbûr Mehmed’e bey‘ ve temlîk ve teslîm ol dahî iştirâ ve temellük ve tesellüm etmişidi lâkin benim târîh-i mezkûrda âlât-ı mezkûreyi zevcim mezbûra bey‘-i mezkûrem beynimizde zevcim mezbûr mâlından bana bir re’s câriye alıvermek şartıyla olmağla şart-ı mezkûr ile bey‘-i mezkûrîmin fesâdına binâ’en bey‘-i mezkûru fesh birle mahzen-i mezkûrda olan yirmi bir sehm âlât-ı mezkûreyi bana teslîme mezbûr Mehmed’e tenbîh olunmak murâdımdır deyü [32b] takrîr üzere bey‘-i evvel mezkûr fâsidden evveliye bey‘-i sânî mezkûr nâfiz ve müdde‘iyye-i mezbûrenin ber-vech-i muharrer mezbûr Mehmed’den da‘vâ-yı mezkûresi meşrû‘a ve mu‘tebere olmamağın da‘vâ-yı mezkûresine iltifât olunmayıp bî-vech-i şer‘î mu‘ârazadan men‘ olunduğu huzûr-ı âlîlerine i‘lâm olundu. Fî 19 min Recebi’l-ferd sene 1202.