İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 138 Hüküm no: 126 Orijinal metin no: [32b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mevlit Kandili sebebiyle cami ve mescitlerde kandil yakılmasının emrolunduğu Ma‘rûz Mazhar-ı sitâyiş-i hitâb-ı levlâk pîrâye mesned vemâ erselnâke mahrem-i râz-ı Hüdâ bedr-i münîr-i âlem-ârâ vâsıl-ı halvet-serây-ı mâ evhâ müttekî çâr-bâş-ı denâ fetedellâ habîb-i Hüdâ şefî‘-i rûz-ı cezâ hazret-i Muhammedü’l-Mustafa aleyhi efdalü’s-selâtü ve ekmelü’t-tehâyâ efendimizin mevvâc-ı nubüvvet-ibtihâcları Recebü’l-müreccebi’nin yirmi yedinci gecesi vâki‘ olduğu müttefekun aleyh ve beher sene şehr-i mezbûrun yirmi yedinci gecesine tevkîr-i lâbüd olduğunu mü’minîn ve mü’minâta i‘lân ve beyân zımnında minârât-ı cevâmi‘ ve mesâcid kanâdîl-i nûr-ı efşânla tezyîn olunmak de’b-i dîrîn-i devlet-i aliyye-i ebediyyü’l-istimrârdan olup ve işbu sene-i ferhûnde fâl Cumâde’l-âhire gurresi yevm-i sebtden olduğu mahzar-ı hasm-ı câhid-i şer‘îde vech-i şer‘î üzre sâbit ve ol vecihle Recebü’l-ferd gurresi yevm-i isneynden olmağla işbu sebt gecesi şehr-i mezbûrun yirmi yedinci leyle-i mübâreke-i mi‘râc olmağla selâtîn-i izâm zevi’l-ihtirâm hazerâtı cevâmi‘-i şerîfeleri kayyımlarına îkâd-ı kanâdîl içün tenbîhi hâvî emr-i âlîleri erzânî buyurulmak bâbında fermân hazret-i veliyyü’l-emrindir.