İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 138 Hüküm no: 127 Orijinal metin no: [33a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Said Ağa b. Mehmed’in sahip olduğu kasap dükkanı gedik hissesi için temessük talep ettiği Ma‘rûz Medîne-i Üsküdar’a muzâfa Kanlıcak kasabasında vâki‘ bir bâb kasab dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin nısf hissesine sadrazam-ı esbâk merhûm Mustafa Paşa Vakfı mütevellîsi temessüküyle mutasarrıf olan Mehmed Said Ağa b. Mehmed meclis-i şer‘-i enverde takrîr-i kelâm edip dükkân-ı mezkûrun gedik ta‘bîr olunur âlâtının nısf hissesi evkâf-ı hümâyûn tarafından temessük ile Beşinci Selhhâne’ye merbût olup benim nısf hissem içün evkâf-ı hümâyûn tarafından yedimde temessük olmamağla Mustafa Paşa Vakfı tarafından yedimde olan temessük evkâf-ı hümâyûn tarafından ahz ve Beşinci Selhhâne’ye merbût olmak üzre yedime müceddeden temessük i‘tâ olunmak matlûbumdur dedikde fi’l-hakîka dükkân-ı mezkûrun gedik ta‘bîr olunan âlât-ı lâzımesinin nısf hissesi hâlâ mezbûr Mehmed Said Ağa’nın tasarrufunda olduğunu ve nısf-ı âharı Beşinci Selhhâne’ye merbût evkâf-ı hümâyûn tarafından temessük ile âharın tasarrufunda olduğunu kasablar kethüdâsı el-Hâc Ali Ağa ve kasab ustalarından es-Seyyid el-Hâc Mehmed Ağa ve el-Hâc Hasan ve el-Hâc Ömer ve el-Hâc Osman nâm kimesneler haber vermeleriyle yedinde olan temessük ahz ve evkâf-ı hümâyûn tarafından yedine müceddeden temessük i‘tâ olunmak ricâsında oldukları İstanbul Mahkemesi’nden huzûr-ı âlîlerine i‘lâm olundu. Fî 23 Receb sene 1202.