İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 141 Hüküm no: 131 Orijinal metin no: [34a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Börekçi Sarı Mehmed’in kendi evine kattığı arsaların sahiplerine iadesi ve kapattığı yolun tekrar açılması Ma‘rûz Nezâret-i hazret-i şeyhülislâm-ı -sellemehü’s-selâm-da âsûde Yahya Paşa Vakfı’ndan istimâ‘ına emr-i âlîleriyle me’zûn olduğumuz zikri âtî menzil arsasına mutasarrıf olan sâhib-i arzuhâl Hâfız Mehmed Emin Efendi b. Hüseyin meclis-i şer‘de derûn-ı arzuhâlde ismi mezkûr Börekçi Sarı Mehmed muvâcehesinde İslâmbol’da Küçükmustafapaşa kurbündeki Molla Hüsrev mahallesinde vâki‘ vakf-ı mezbûrda ma‘lûmü’l-hudûd hâlâ bi’l-icâreteyn taht-ı tasarrufumda olan bir bâb muhterik menzil arsasının sokak kapısı ittisâlinde mezbûr Sarı Mehmed’in vakf-ı merkûmdan mutasarrıf olduğu menzil mukâbilinde Âişe ve Ümmügülsüm Hatunlar ferâğından re’y-i mütevellî ile hayâtında tasarrufu olan arsaları menzil-i mezbûru havlusuna idhâl ve menzil-i mezbûr ile arsateyn-i merkûmeteyn beyninde mürûr eylediğimiz arzen iki buçuk zirâ‘ târik-i nâfiz-i kadîmi dahî menzil derûnuna idrâc ile sedd ü bend ve hakk-ı mürûrlarımızı kat‘ etmekle tarîk-i merkûm kadîmi üzere küşâd olunmak matlûbumdur deyü eylediği da‘vâsını bundan akdem imtisâlen li-emri’l-âlî kıbel-i şer‘den me’zûnen mürsel keşf nâ’ibi Şükrullah Efendi ve hâssa mi‘mârı hulefâlarından Ali Reşid ve Ahmed Halîfeler ile vakf-ı merkûm mütevellîsi Mehmed Said b. Mehmed Emin hâzır olduğu hâlde keşf ve mu‘ayene eyledikleri meclis-i ma‘kûd-ı mezbûr Sarı Mehmed inkâr etmekle müdde‘î-i mezbûr ber-vech-i muharrer müdde‘âsını mahalle-i mezbûre ahâlîsinden kapıları tarîk-i âhara küşâde ve tarîk-i mezbûre ihtiyâçları olmayan udûlden Bürüncü Halil ve Ebubekir b. Mehmed ve es-Seyyid Hasan Odabaşı vesâ’ir mazbûtü’l-esâmî Müslimîn şehâdetleriyle mahallinde vech-i şer‘î üzre mezbûr Sarı Mehmed’in muvâcehesinde isbât eylediğini meclis-i şer‘a ba‘de’l-inhâ mûcebiyle mezbûr Sarı Mehmed’in menzil-i mezkûru ile mukâbilinde olan arsa-i merkûmeler beyninde sed eylediği tarîk-i mezbûrun vaz‘-ı kadîmi üzre küşâdına mezbûr Sarı Mehmed’e tenbîh olunduğu huzûr-ı âlîlerine [i‘lâm] olundu. Fî 28 B. sene 1202.