İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 142 Hüküm no: 132 Orijinal metin no: [34a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uncu Karaali ile Şekerci Molla Hüseyin’in İstanbul’a gizlice un getirip sattıkları Ma‘rûz Âsitâne-i aliyye’de vâki‘ habbâzân esnâfının kethüdâları İsmail Ağa ve Uncular Kethüdâsı Mustafa Ağa ve nizâm ustalarından Ahmed Ağa ve Bedir oğlu Mustafa ve el-Hâc İsmail ve Mehmed Beşe ve Süleyman Beşe ve Eyüb Ağa ve es-Seyyid Süleyman ve es-Seyyid Ömer Ağa ve Hasan Ağa nâm kimesneler ile zimmîlerden Usta Vartan ve Usta Abram ve Usta Kazar ve Usta Bedros ve Serkiz ve Tokil ve Aleksan ve Karabet vesâ’irleri meclis-i şer‘-i enverde Uncu Karaali b. Mehmed mahzarında mezbûr Karaali ve gâ’ib ani’l-beled Şekerci Molla Hüseyin kendi hallerinde olmayıp hilâf-ı fermân-ı âlî ve muğâyir-i nizam taşradan Âsitâne-i aliyye’ye vürûd eden dakîki hufyeten iştirâ ve Tekfurdağı’ndan şerîklerinin irsâl eylediği dakîki bir takrîbiyle kapandan ihrâc ve izâ‘at olunacak mahallere ve sefînelere ziyâde bahâ ile hufyeten bey‘ ve ol vecihle ihtikârı kendilere âdet ve zehâ’irin itlâfına bâ‘is ve nizâm-ı kadîmimizin ihtilâline bâdî olmalarıyla mezbûrândan bir vecihle emniyetimiz yokdur deyü teşekkî ve te’dîblerini iltimâs eylediklerinde mezbûr Karaali dahî fîmâ ba‘d unculuk etmeyip ve Kapan-ı Dakîk’den dakîk ve hınta bey‘ u şirâsına karışmayıp kesb-i âhara şürû‘a ta‘ahhüd eyledikde esnâf-ı mezbûrûn dahî râzı olup gümrük-ı mezbûr Karaali ve gerek gâ’ib-i mezbûr Şekerci Molla Hüseyin eğer ba‘de zamânin bir takrîb Kapan-ı Dakîka duhûl ve bu gûne ihtikâra müdâhale ve tecâsür ederler ise veyâ âhara nefy ve iclâ ile te’dîb olunmaları bâbında fermân-ı âlîleri sudûrunu istid‘â eyledikleri İstanbul Mahkemesi’nden huzûr-ı âlîlerine i‘lâm olundu. Fî 25 Receb sene 1202.