İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 150 Hüküm no: 141 Orijinal metin no: [37a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avram v. David’in tütüncü dükkanı gedik hisse ve aletlerini es-Seyyid Mustafa’ya sattığı Ma‘rûz Hâmiş-i arzuhâlde mastûr derkenâr nâtık olduğu üzre Ma‘den kaleminde mukayyed gediklerinden olup medîne-i Hazret-i Ebâ Eyyûbe’l-Ensârî’de Defterdâr iskelesi kurbünde vâki‘ bir bâb kadîm tütüncü dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin mutasarrıfı sâhib-i arzuhâl Avram v. David nâm Yahûdî meclis-i şer‘-i enverde duhâncı esnâfının kethüdâları İbrahim Ağa ve Yiğitbaşı es-Seyyid Mehmed Çelebi hâzır oldukları hâlde esnâf-ı mezbûreden es-Seyyid Mustafa b. es-Seyyid el-Hâc Salih mahzarında takrîr-i kelâm edip ber-vech-i muharrer mutasarrıf olduğum gedik ta‘bîr olunan âlât-ı mezkûremi yüz yirmi guruş semen-i makbûza mezbûr es-Seyyid Mustafa’ya bâtten ve sahîhan bey‘ ve temlîk ve teslîm eylediğimde ol dahî ber-vech-i muharrer iştirâ ve temellük ve tesellüm ve kabûl edip fîmâ ba‘d âlât-ı mezkûrede benim kat‘â [37b] alâka ve medhalim kalmayıp mezbûr es-Seyyid Mustafa’nın mülk-ı müşterâsı olmuşdur dedikde mezbûr es-Seyyid Mustafa dahî tasdîk etmekle gedik-i mezkûr kaydı mersûm Avram Yahûdî üzerinden terkîn ve mezbûr es-Seyyid Mustafa üzerine kayd birle yedine sûret i‘tâ olunmak niyâzında oldukları huzûr-ı âlîlerine i‘lâm olundu. Fî 5 min Şa‘bân sene 1202.