İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 149 Hüküm no: 140 Orijinal metin no: [37a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kirkor v. Kigork ve ortağının yanan değirmen ve fırınlarını başka bir mahalle taşımak için ortaklık teklif eden Simaven v. Kazar’la olan davalarında sulh yoluyla anlaştıkları Ma‘rûz Etmekçi tâ’ifesinden sâhib-i arzuhâl Kirkor v. Kigork nâm zimmî asâleten ve şerîki kezâlik kendi nefsinden asîl ve âhar şerîkleri Kapril v. Saçok nâm zimmî tarafından vekîl olduğu Kirkor v. Bedros ve Abram v. Mercan şehâdetleriyle sâbit olan Avanes v. Kaspar ve kezâlik kendi nefsinden asîl ve şerîkleri Zakar v. Ohan tarafından vekîl olduğu Bogos v. Avanes ve Kirkor v. Hacador nâm zimmîler şehâdetleriyle sâbit olan Felyos v. Zakar nâm zimmî meclis-i şer‘-i enverde habbâzân kethüdâsı İsmail Ağa ve nizâm ustaları hâzır oldukları hâlde derûn-ı arzuhâlde mastûrü’l-ism Simaven v. Kazar nâm zimmî muvâcehesinde İstanbul’da Kumkapı’da Nişancı Hamâmı kurbünde vâki‘ bir bâb habbâz fırını derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme bizim ve müvekkilân-ı merkûmânın iştirâken yedimizde mülkümüz iken fırın-ı mezkûr bundan akdem bi-kazâ’llâh-i te‘âlâ muhterik oldukda mülk sâhibinin binâya iktidârı olmayıp ve mersûm Simaven zimmî bizi kendiye şerîk etmek üzre va‘d etmekle biz dahî mersûm Simaven zimmînin kable’l-harîk Kırkçeşme’de olan üç horoslu uncu değirmenini mârrü’z-zikr fırın arsası üzerine nakl ile değirmen binâ etmek üzere kendiye izin vermişidik lâkin mersûm Simaven zimmî bizi kendiye şerik etmemekle ber-mûceb-i şurût-ı nizâm değirmen-i mezkûr arsası mukaddemâ bizim fırın gediğimiz arsası olduğuna binâ’en nakl eylediği değirmeni âhar mahalle nakl ve arsa-i mezkûreyi bize teslîme mersûm Simaven zimmîye tenbîh olunmak bi’l-asâle ve bi’l-vekâle matlûbumuzdur deyü tasaddî eylediğimiz da‘vâmızdan bâ-vesâtat-ı muslıhîn merkûm Simaven zimmî ile beş yüz guruş bedel-i makbûza sulh olup husûs-ı mezkûra müte‘allika âmme-i da‘vâdan her birimiz âharın zimmetini bi’l-asâle ve bi’l-vekâle ibrâ ve ıskât ve her birimiz ber-vech-i muharrer âharın ibrâsını kabûl eyledik dedikde mersûm Simaven zimmî dahî mukırrûn-ı merkûmûnu tasdîk ve ber-vech-i muharrer ibrâlarını kabûl ve bu vecihle kat‘-ı münâza‘a eyledikleri huzûr-ı âlîlerine i‘lâm olundu. Fî 9 min Şa‘bân sene 1202.