İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 151 Hüküm no: 145 Orijinal metin no: [38a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. es-Seyyid Ömer Odabaşı ve karısının kötü insanlar olması sebebiyle mahalleden ihraç edilmeleri Ma‘rûz İstanbul’da Yenibahçe kurbünde Mimarsinan mahallesi imâmı vekîli İbrahim Efendi ve Müezzin Molla Ömer ve ahâlîsinden İbrahim Ağa ve Hasan Ağa ve el-Hâc İbrahim Ağa ve Esirci el-Hâc İbrahim Ağa ve el-Hâc İbrahim ve el-Hâc Mehmed ve el-Hâc Eyüb Ağa ve es-Seyyid el-Hâc Mehmed ve el-Hâc Süleyman Odabaşı ve Hüseyin Odabaşı vesâ’irleri meclis-i şer‘-i enverde mahalle-i mezbûre ahâlîsinden sâhib-i arzuhâl es-Seyyid Ömer Odabaşı b. Salih nâm kimesne mahzarında mezbûr es-Seyyid Ömer Odabaşı gâ’ibetân ani’l-meclis zevcesi Fatma bt. İbrahim ve kâ’in vâlidesi Esma bt. Abdullah nâm hatunlar ile ma‘an mahallemizde sâkinler olup lâkin kendi hallerinde ırzlarıyla mukayyedler olmayıp bed-zebân ve hadîdü’l-lisân olmalarıyla bi’d-defâ‘at mahalleden ihrâc olunmalarıçün mahalle câmii kapısına tezkire bıraktıklarından mâ‘adâ mezbûr es-Seyyid Ömer Odabaşı târîh-i i‘lâmdan üç gün mukaddem mahallemizin asîl imâmı olan işbu hâzır bi’l-meclis el-Hâc Abdullah Efendi’yi bi-gayr-ı hakkın darb ve şetm etmekle mezbûrûndan bir vecihle emniyemiz yokdur deyü teşekkî ve mahalle-i mezbûreden hurûçlarını iltimâs eyledikleri mübâşirleri Mumcu Mehmed Beşe yediyle huzûr-ı âlîlerine i‘lâm olundu. Fî 13 Ş. sene 1202.