İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 152 Hüküm no: 146 Orijinal metin no: [38a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kızıl el-Hâc Hüseyin Vakfı’nın mütevellisi Ahmed Bey b. Ali’nin muhasebesinin görülmesi Ma‘rûz İstanbul’da Tercüman Yunus Câmi-i Şerîfi civârında vâki‘ nezâret-i dâ‘îlerinde olan evkâfdan merhûm Kızıl el-Hâc Hüseyin Vakfı’ndan olmak üzere yevmî dört akçe ile mescid ve iki akçe vazîfe ile mekteb tevliyetlerine mutasarrıf olan Ahmed Bey b. Ali tevliyeteyn-i mezkûreteyn umûrunu rü’yet ve idâreye ve muhterik mescid ve mekteb-i mezkûrları galle-i vakıfdan kendiye teslîm olunan iki yüz yirmi beş guruş müste’cirîn zimmetlerinde müctemi‘ olan icârâtı cem‘ ve tahsîl ile müceddeden binâya dört ay mukaddem ta‘ahhüd ve binâya şürû‘ eyledikde mescid-i mezkûrun ancak cevânib-i erba‘ası duvarları ile üzerinin mikrâzını vaz‘ ve alâ hâlihî terk eyledikde tekmîli içün bi’d-defâ‘at kendiye tenbîh olundukda mütenebbih olmadığından mâ‘adâ şer‘-i şerîfe adem-i itâ‘atine binâ’en tevliyeteyn-i mezkûreteynin ref‘i lâzım gelmeğin tevliyeteyn-i mezkûreteyn vazîfe-i mersûmeleriyle mezbûr Ahmed Bey ref‘inden umûr-ı vakfı sadâkat ve istikâmet ile rü’yete ve mescid-i mezkûr ile mekteb-i mezkûru binaya kādir müderrisîn-i kirâmdan Şevkî Hüseyin Efendi’ye tevcîh olunmağın mütevellî-i sâbık-ı mezbûr Ahmed Bey’in mescid-i mezbûru binâya mübâşeret ve nâ-tamâm terk eylediği ebniye mevcûdesi ma‘rifet-i şer‘ ve mi‘mâr ağa ma‘rifetiyle keşf ve takvîm olundukda bir kıt‘a mi‘mâr ağa defteri nâtık olduğu üzere mikdâr-ı masrûfu beş yüz elli üç guruşa bâliğ olmağla mütevellî-i sâbık-ı mezbûr Ahmed Bey ile muhâsebelerini rü’yet etmek üzre mütevellî lâhık-ı mûmâileyh Hüseyin Efendi mescid ve mektebi binâ içün galle vukû‘unda rücû‘ şartıyla âhardan [38b] istidâneye kıbel-i şer‘den izin verilmeğin mütevellî-i mezbûr masrûfâtını galle-i vakfdan tamâmen istîfâ ve şer‘an azli iktizâ etmedikçe azl olunmayıp kable’l-istîfâ azl veyâhûd fevt olur ise mescid ve mekteb tekmîl içün istidâne eylediği meblağı mütevellî ve kâ’immakâm bi-tarîkı’l-havâle kabûl etmedikçe tevliyet-i mezkûre âhara arz ve tevcîh olunmamak üzre kaydı mahalline şerh ve yedine tuğrâ-yı garrâ ile mu‘anven emr-i âlîşân i‘tâ buyurulmak bâbında fermân-ı âlîleri sudûrunu istid‘â eylediği İstanbul Mahkemesi’nden huzûr-ı âlîlerine i‘lâm olundu. Fî 9 Ş. sene 1202.