İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 158 Hüküm no: 153 Orijinal metin no: [40b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa b. Hüseyin’in karısına verdiği evi alacaklarına karşılık geri aldığı, değirmen, aletleri ve bargirleri karısı Şerîfe Hadîce’ye sattığı Ma‘rûz Derûn-ı arzuhâlde mezkûrü’l-ism İbrahim Ağa b. Hüseyin nâm kimesne meclis-i şer‘-i enverde zevcesi sâhibe-i arzuhâl mu‘terifü’z-zât Şerîfe Hadîce bt. es-Seyyid Mustafa nâm hatun mahzarında zevcem mezbûre târîh-i i‘lâmdan bir buçuk sene mukaddem yedimden üç bin guruşu iktirâz ve kabz edip mukâbelesinde Ayasofya-i Kebîr Câmî-i Şerîfi civârında vâki‘ Çerâğî Hamza Vakfı’ndan ma‘lûmü’l-hudûd ve’l-müştemilât bir bâb menzili bâ-re’y-i mütevellî bana vefâ’en fâriğa olmağla menzil-i mezkûru girü ahz birle meblağ-ı mezkûr üç bin guruşu bana teslîme mezbûre Şerîfe Hadîce Hatun’a tenbîh olunmak matlûbumdur deyü da‘vâya tasaddî eylediğimde zevcem mezbûre dahî cevâbında Beylerbeyi [41a] Değirmeni odası döşemesi semeninden bin guruş ve Atmeydanı’nda vâki‘ Camlı Değirmen’de olan on dört re’s bargir ve âlât-ı lâzımesi ücretinden ve fâ’ideden on sekiz ayda müctemi‘ dokuz yüz yetmiş beş guruşu kezâlik eşyâ semeninden dahî beş yüz guruş ki cem‘an iki bin dört yüz yetmiş beş guruş zimmetinde alacağım olmağla deynim olan meblağ-ı mezkûr üç bin guruşun iki bin dört yüz yetmiş beş guruşu füru-nihâde olunup bâkî kalan beş yüz yirmi beş guruşu yedimden ahz birle menzil-i mezkûru bâ-re’y-i mütevellî bana ferâğa [41a] tenbîh olunmak matlûbumdur deyü benden da‘vâ ve ol vecihle beynimizde ba‘de vukû‘i’l-münâza‘a bâ-vesâtat-ı muslıhîn beni ma’arrü’z-zikr Camlı Değirmen’de olan iki re’s bargir ve âlât-ı lâzıme-i ma‘lûmemi bâ-hüccet-i şer‘iyye zevcem mezbûreye altı yüz guruşa bâtten bey‘ ve temlîk ve yedimde olan atîk hüccetleriyle ma‘an teslîm ve meblağ-ı mezkûr üç bin guruşu da‘vâsından dahî zevcem mezbûre ile bin beş yüz guruş üzerine sulh olup menzil-i mezkûru bâ-re’y-i mütevellî girü ferâğa ta‘ahhüd eylediğimde ol dahî sulh-ı mezkûru kabûl edip ol vecihle değirmen-i mezkûrun gedik ta‘bîr olunan bargir vesâ’ir âlât-ı lâzıme-i ma‘lûmesinin mecmû‘ı zevcem mezbûrenin malı olup benim kat‘â alâka ve medhalim kalmamağla bedel-i sulh-ı mezkûr bin beş yüz guruş ile ferâğa müte‘ahhid olduğum menzil-i mezkûrdan mâ‘adâ husûs-ı mezkûra ve bi’l-cümle hukûk-ı sâ’ireye müte‘allika âmme-i da‘vâdan her birimiz âharın zimmetini ibrâ ve iskāt ve her birimiz âharın ibrâsını kabûl eyledik dedikde mezbûre Şerîfe Hadîce Hatun dahi mukırr-ı merkûmu cemî‘ kelimâtında tasdîk ve ibrâsını kabûl eylediği tescîl ve huzûr-ı âlîlerine i‘lâm olundu. Fî 19 min Ş. sene 1202.