İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 157 Hüküm no: 152 Orijinal metin no: [40a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen el-Hâc Hüseyin Efendi’nin varislerinin, tereke taksiminde alınan vergilerin iki kere alındığı gerekçesiyle Hamdullah Efendi’ye açılan davada anlaştıkları Ma‘rûz Medîne-i İzmir’de Kestânebazarı kethüdâsı iken bundan akdem fevt olan el-Hâc Hüseyin Efendi’nin verâseti hîn-i vefâtında sagîr ve hâlâ on beş yaşında olmağla sinni ve cüssesinin bülûğa tahammülü ve bülûğunu mu‘terif olan sulbî oğlu Molla Mustafa ile zevce-i menkûha-i metrûkesi Rukiye bt. Benli el-Hâc Mehmed’e inhisârı tahakkukundan sonra mezbûr Molla Mustafa asâleten vâlidesi ve hâl-i sığarında bâ-hüccet-i şer‘iyye vasîsi zevce-i mezbûre Rukiye Hatun’un hâlâ zevci tarafından ber-vech-i âtî vekîl olduğu zâtını ârifân Molla Hüseyin b. Mehmed ve es-Seyyid Eyüb b. Hasan şehâdetleriyle sâbit olan Hâfız Ali b. Hüseyin vekâleten mezbûr Molla Mustafa’nın hâl-i sığarında vasî-i sânîsi es-Seyyid Abdurrahman Efendi [40b] b. Ahmed hâzır olduğu hâlde bâ-işâret-i aliyye hazret-i veliyyü’n-na‘mî sâdır olan fermân-ı âlîlerine imtisâlen meclis-i şer‘-i enverde bin iki yüz bir senesinde İzmir kadısı olan mevâlî-i i‘zâmdan fazîletlü Hamdullah Efendi mahzarlarında mûrisimiz babam müteveffâ-yı mezbûr el-Hâc Hüseyin Efendi mûmâileyh Hamdullah Efendi’nin hîn-i hükûmetlerinde medîne-i mezbûrede fevt oldukda bi’l-cümle terekesini tahrîr eylediklerinde resm-i kısmet ve harc-ı hüccet nâmıyla bi’d-defâ‘at tereke-i müteveffâ-yı mezbûrûn sekiz bin sekiz yüz altmış yedi guruş kabz etmeleriyle makbûzları olan meblağ-ı mezkûrdan resm-i âdî ve harc-ı hüccet-i kalemiye ve huddâmiye ve kaydiye ve dellâliye olan cem‘an iki bin sekiz yüz elli iki guruş füru-nihâde olup ziyâde makbûzları altı bin on beş guruşu efendi-i mûmâileyhden bi’l-asâle ve bi’l-vekâle taleb ederiz deyü da‘vâ eylediklerinde mûmâileyh Hamdullah Efendi dahî cevâbında müteveffâ-yı mezbûrun terekesinden resm-i kısmet ve harc-ı hüccet ve kalemiye ve huddâmiye nâmıyla ancak dört bin yüz üç guruşu ahz u kabz eylediğini ikrâr ve müdde‘iyyân-ı mezbûrânın müdde‘âları olan meblağın dört bin beş yüz guruşunu müteveffâ-yı mezbûr el-Hâc Hüseyin Efendi hayâtında kendiden mukaddem fevt olan Koca Hacı Mustafa’nın sülüs vesâyâsını tenfîze vasî-i muhtârı olup sülüs mâlı olan dört bin beş yüz guruşu kabz ve vesâyâ-yı mu‘ayyenesini kable’t-tenfîz fevt oldukda müteveffâ-yı evvel-i mezbûrûn vesâyâ-yı mu‘ayyenesini tenfîze bâ-hüccet-i şer‘iyye vasîsi olan Ali Efendi meblağ-ı mezkûr dört bin beş yüz guruşu müteveffâ-yı mezbûr el-Hâc Hüseyin Efendi’nin zevcesi ve mezbûr Molla Mustafa’nın hâl-i sıgarında vasî-i sânîsi mezbûr es-Seyyid Abdurrahman Efendi hâzır oldukları hâlde terekesinden benim huzûrumda da‘vâ ve şuhûd-ı udûlle vech-i şer‘î üzere isbât ettikde ben dahî meblağ-ı mezkûru tereke-i müteveffâ-yı mezbûrdan hükm ve tahsîl ve vasî-i mezbûre teslîm eyledim deyip ziyâde müdde‘âlarını ba‘de’l-inkâr husûs-ı mezkûrda mûmâileyh Hamdullah Efendi şer‘an kavliyle tasdîk olunup ol vecihle beynimizde ba‘de vukû‘i’l-münâza‘a bâ-vesâtat-ı muslıhîn biz da‘vâ-yı mezkûremizden mûmâileyh Hamdullah Efendi ile sekiz yüz guruşu bedel-i makbûza bi’l-asâle ve bi’l-vekâle sulh olduğumuzdan ol dahî sulh-ı mezkûru ba‘de’l-kabûl mâ‘adâya ve bi’l-cümle husûs-ı mezbûra ve hukûk-ı sâ’ireye müte‘allika âmme-i de‘âvî ve kâffe-i mutâlebâtdan her birimiz mûmâileyh Hamdullah Efendi’nin ve kethüdâları Mehmed Emin Efendi’nin zimmetlerini şurût-ı müfside ve muvâza‘adan ârî ibrâ’-i âmm-ı sahîh-i şer‘î ile bi’l-asâle ve bi’l-vekâle ibrâ ve iskāt eylediğimizde anlar dahî ibrâ’-i mezkûru kabûl eylediler dediklerinde mûmâileyh Hamdullah Efendi dahî mukırrân-ı mezbûrânı tasdîk ve ber-vech-i muharrer ibrâlarını kabûl ve bu vecihle kat‘-ı münâza‘a eyledikleri huzûr-ı âlîlerine i‘lâm olundu. Fî 15 Ş. sene 1202.