İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 159 Hüküm no: 155 Orijinal metin no: [41b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsrafil v. Apostol’un tütün dükkanı gedik hisse ve aletlerini Petro v. Angeli’ye sattığı Yâ Hazret-i Allah Bismillâhirrahmânirrahîm Yâ Fettâh Yâ Kerîm Yâ Settâr Ma‘rûz Duhânî esnâfından İsrafil v. Apostol nâm zimmî meclis-i şer‘-i şerîf-i enverde Kethüdâ İbrahim Ağa b. Ahmed ve Yiğitbaşı es-Seyyid Mehmed b. Yusuf hâzır olduğu hâlde esnâf-ı mezbûreden Petro v. Angeli nâm zimmî muvâcehesinde işbu yedimde olan sûret nâtıka olduğu üzre şurût-ı nizâma dâhil ve Ma‘den kaleminde mukayyed olup mahmiyye-i İstanbul hısnı ebvâbından Langa-i Kebîr dâhilinde kâ’in müşâhereten müste’ciri olduğum bir bâb dükkân derûnunda mevcûde beyne’l-hıref gedik ta‘bîr olunur dühânî âlât-ı lâzımemi tarafeynden bi’l-îcâb ve’l-kabûl bâtten ve sahîhan üç yüz guruşa mersûm Petro zimmîye bey‘ ve temlîk ve teslîm ol dahî ber-vech-i muharrer iştirâ ve temellük ve tesellüm ve kabûl edip ve semen-i mezbûru yedinden kabz edip ba‘de’l-yevm âlât-ı lâzıme-i mezkûrede benim kat‘â alâka ve medhalim kalmayıp mersûm Petro zimmînin mülk-ı müşterâsı olmuşdur deyü eylediği takrîr-i meşrûhunu hâzırân-ı mezbûrân ve mersûm Petro zimmî tasdîk ve âlât-ı mezkûrenin bâyi‘-i mesfûr İsrafil zimmî üzerinde olan kaydı ma‘den kaleminden terkîn ve mersûm Petro üzerine kayd birle yedine müceddeden sûret verilmek ricâsında oldukları mahmiyye-i mezbûre mahkemesinden huzûr-ı âlîlerine i‘lâm olundu. Fî 21 Ş. sene 1202.