İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 160 Hüküm no: 156 Orijinal metin no: [41b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasber v. Anderyas’ın, Veli Beşe’nin fırını önünde ekmek satmasının yasaklandığı Ma‘rûz Mahrûse-i Galata’ya muzâfa kasaba-i Kasımpaşa’da Kulaksız nâm mahalde vâki‘ hâs fırın ustası sâhib-i arzuhâl Veli Beşe meclis-i şer‘-i şerîf-i enverde Kağıdhâne’de vâki‘ hâs fırın ustası Kasber v. Anderyas zimmî tarafından vekîli Andon v. Yorgi ile terâfu‘larında mersûm Kasber mârrü’l-beyân Kağıdhâne’de vâki‘ fırınında tabh eylediği hâs etmeği on nefer tablakârlarına esvâk ve bazarda bey‘ içün benim fırınım kurbünde vâki‘ hamâmı maksem ittihâz ve hamâm-ı mezkûrda beher yevm tevzî‘ anlar dahî fırınım önünde bey‘ edip benim kesbime muzır olmağın âhar mahalli maksem etmek üzre mersûm Kasber’e tenbîh olunmak murâdımdır deyip vekîl-i mersûm dahî cevâbında fi’l-vâki‘ hamâm-ı mezkûr maksem olduğunu ikrâr lâkin fırını önünde etmek bey‘ olunduğunu inkâr edip beyinlerinde ba‘de vukû‘i’l-münâza‘a kethüdâları İsmail Ağa ve uncular kethüdâsı Mustafa Ağa ve nizâm ustalarından Ahmed Ağa ve es-Seyyid Ömer Ağa ve Kadir Ağa ve Mehmed Usta ve Ali Usta ve Bekir Usta ve Süleyman Usta ve Flibos ve Ahram ve Aleksan ve Kirkor ve Tokel vesâ’ir ma‘lûmü’l-esâmî ustalar fîmâ ba‘d mersûm Kasber zimmî zikr olunan on nefer tablekârlarına Okmeydanı’nda vâki‘ Kemânkeşân Tekyesi’ni maksem edip mezbûr Veli Beşe’nin fırını önünde etmek bey‘ olunmamak üzre tanzîm ve beyinlerin tevfîk etmeleriyle mezbûr Veli Beşe ve mersûm Kasber dahî fırında tabh olunan etmekden kendileri ve tablekârları habbâzân fırınlarında merbût ve mahsûs olan tablalara hâs etmek vermemeğe ta‘ahhüd eyledikleri İstanbul Mahkemesi’nden huzûr-ı âlîlerine i‘lâm olundu. Fî 24 min Şa‘bân sene 1202.