İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 169 Hüküm no: 168 Orijinal metin no: [45a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hurdefuruş esnafının nizamlarını ihlal eden Menteş v. İlya’nın cezalandırılması Ma‘rûz Arzuhâl eden hurdefuruş esnâfının kethüdâları Mosi v. İsak ve yiğitbaşıları Nito v. Pako ve Avram ve Sebatay ve diğer Avram ve Arslan ve Nesim ve Refael ve esnâf-ı mezbûrdan sâ’ir mazbûtü’l-esâmî Yahûdîler meclis-i şer‘-i şerîf-i enverde Mahmudpaşa sûkunda vâki‘ tenekeden huni ve fener ve mankal tahtası ve bunun emsâli nesne tasni‘ eden esnâfdan Menteş v. İlya nâm Yahûdî ile terâfu‘larında işbu yedimizde olan müte‘addid evâmir-i aliyye ve i‘lâmât-ı şer‘iyyeler mantûklarınca sarı ve beyaz teneke emti‘a-i ma‘dûde-i mahsûsamızdan olmağın taşradan Âsitâne-i aliyye’ye getiren tüccârdan biz bazarını kat‘ ve iştirâ ve dükkân ve mahzenlerimize vaz‘ eylediğimizden sonra tenekeci esnâfı iktizâ eden tenekeyi bizden iştirâ edip nizâm-ı mezkûre beynimizde düstûrü’l-amel olmağın Âsitâne-i aliyye ve bilâd-ı selâsede vâki‘ bi’l-cümle tenekeci esnâfı ber-mûceb-i şurût ve nizâm amel ve hareket edip ancak işbu Menteş Yahûdî [45b] hilâf-ı emr-i âlî ve muğâyir-i şurût ve nizâm hufyeten tüccârdan ziyâde bahâ ile teneke iştirâ edip nizâm-ı mezkûremizin adem-i istiklâliyle ihtilâl ve izmihlâline bâ‘is olacak âşikâr olmağın mersûm Menteş Yahûdî’nin te’dîb olunması murâdımızdır deyü üç kıt‘a i‘lâm-ı şer‘î ve hâmiş-i arzuhâlde muharrer derkenâr ve tuğrâ-yı garrâ ile mu‘anven emr-i âlî ibrâzıyla ba‘de’l-iştikâ mersûm Menteş cevâbında mersûmûnun ibrâz eyledikleri evâmir-i aliyye ve i‘lâmât-ı şer‘iyyelerin mazmûnlarını ve fi’l-vâki‘ hilâf-ı emr-i âlî ve muğâyir-i şurût ve nizâm tüccârdan teneke iştirâ eylediğini ikrâr ve i‘tirâf edip kemâl-i şirret ve inâdından ba‘de’l-yevm husûs-ı mezkûrdan keff-i yed etmeyip ısrâr edeceğini beyân ve i‘lân etmekle hurdefuruş esnâfı mersûm Menteş Yahûdî’nin ıslâh-ı nefs oluncaya değin Tersâne-i âmireye vaz‘-ı kürek olunmasını istid‘â eyledikleri İstanbul Mahkemesi’nden huzûr-ı âlîlerine i‘lâm olundu. Fî 18 N. sene 1202.