İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 169 Hüküm no: 167 Orijinal metin no: [45a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çehre ve bürüncek esnafının nizamlarına muhalif iş yapmak isteyenlerin men edilmeleri Ma‘rûz İstanbul’da vâki‘ çehre ve bürüncek bükücü esnâfının kethüdâları Halil Odabaşı ve ustalardan el-Hâc İbrahim Odabaşı ve el-Hâc Ahmed Ağa ve Osman Beşe ve Mustafa Beşe ve Kirkor ve Avanis ve Andriyas ve Serkiz ve Matyos ve Kerope ve diğer Kirkor ve Manas vesâ’ir müsin ve ihtiyâr ustaları bi’t-terâzî meclis-i şer‘-i şerîf-i hatîr-i lâzımü’t-tevkîrde esnâf-ı mezbûrdan Agob v. Keşiş nâm zimmî hâzır olduğu hâlde her biri ikrâr ve takrîr-i kelâm edip esnâfımıza mahsûs bodrumlarda mevcûd olup beynimizde gedik i‘tibâr olunan destgâhlara mutasarrıf ve ustalarımızın beher destgâhında bir kalfa ve bir şâkird ile beher yevm dört aded çehre tertîb ve tanzîmi kâfî ve hâsıl olan nemâsı kût-i yevmiye ve ücretlerine vâfî olup ve bu sûretde tanzîm olunan çehrelerimiz temiz ve a‘lâ olmağla ibâdullâhı nâfi‘ ve mahs-ı hayr iken ba‘zı ustalarımız kanâ‘at etmeyip yevmî beş altı çehre i‘mâl etmek sevdâsıyla kalb ve reddî işleyip ibâdullâha muzır olmağın teftîş olundukda işbu hâzır mersûm Agob zimmînin destgâhında ziyâde çehre zuhûr ettikde kalfam Sogomun haberim yoğ iken işlemiş deyü kendi amelini inkâr ve fîmâ ba‘d dört çehreden ziyâde işlememeğe ta‘ahhüd etmekle ba‘de’l-yevm tafsîl olunduğu vech üzre beher destgâh bir kalfa ve bir şâkird ile yevmî dört aded çehreden ziyâde çıkarmayıp ve ba‘de’l-asr kalfa ve şâkirdlerini işletmeyip ve çehrelerinin temiz ve a‘lâ olmasında sa‘y-ı cemîl etmeğe bezl-i makderet olunup ihtiyâr olunan ustalar destgâhlarında katcı ve kalfa ve şâkird kullanıp ihtiyâr olmayanlar ancak kalfa ve şâkird kullanıp ba‘dezîn beher destgâhda dört çehre ve ber-vech-i muharrer ameleden ziyâde olunmayıp olunduğu takdîrce ashâbı vech-i lâyık üzre te’dîb olunmak üzre her birimiz râzılar olduk deyü tertîb ve tanzîm eyledikleri nizâm ilâ mâşâllâh düstûrü’l-amel tutulmak bâbında yedlerine emr-i âlî inâyet ve ihsân buyurulmak ricâsında oldukları İstanbul Mahkemesi’nden huzûr-ı âlîlerine i‘lâm olundu. Fî 13 min Ramazan sene 1202.