İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 170 Hüküm no: 170 Orijinal metin no: [45b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hilal’in görünüp Ramazan ayının başlaması sebebiyle cami ve mescit minarelerinde kandil yakılmasının emredildiği Molla Musa b. İsmail nâm kimesne meclis-i şer‘-i şerîf-i enverde Mahmud Efendi b. Mehmed ile terâfu‘larında mezbûr Mahmud Efendi zimmetinde bin iki yüz iki senesi Ramazânü’l-mübâreki gurresinde edâ etmek üzere mü’eccelen yedimden müşterâ ve makbûz bir çarşab semeninden hakkım olan yirmi beş guruşu hâlâ hilâl-i Ramazân-ı Şerîf rü’yet olunmağla taleb ederim deyü ba‘de’d-da‘vâ ve’l-istintâk mezbûr Mahmud Efendi cevâbında müdde‘î-i mezbûrun takrîr-i meşrûhu üzre semen-i mebî‘-i mezkûrdan ber-vech-i muharrer mü’eccelen yirmi beş guruş zimmetinde deyni olduğunu ikrâr lâkin hilâl-i gurre-i Ramazân rü’yet olunduğunu inkâr etmeğin müdde‘î-i mezbûrun li-ecli’ş-şehâde meclis-i şer‘a ihzâr eylediği lede’t-tezkiye adâletleri bi’l-ihbâr mütehakkık olan Molla Hasan b. Süleyman ve Hoca Hamza Câmi‘-i Şerîfi minâresinden ve mahalle-i mezbûre ahâlisinden Osman b. Mehmed ve zevcesi Âişe bt. Abdullah ve müste’ciri diğer Âişe bt. Abdullah mahalle-i mezbûrede vâki‘ menzilinde kâ’in tahta pûş ta‘bîr olunur ulvî mahalden işbu Perşembe gecesi ba‘de gurûbü’ş-şems cânib-i garbda iki uçları kıbleye müteveccih bir kebîrce yıldız berâberinde iki aded sehâb beyninde hilâl-i Ramazân’ı ra’ye’l-a‘yn müşâhede eyledik deyü her biri edâ-i şehâdet-i şer‘iyye etmeleriyle mûcebince mezbûr Mahmud Efendi’ye mukarrer ve mu‘terif olduğu meblağ-ı mezkûr yirmi beş guruşu müdde‘î-i mezbûr Musa’ya alâ mûceb-i ikrârihî edâya ba‘de’t-tenbîh da‘vâ-yı mezkûr zımnında yarın ki yevm-i hams gurre-i Ramazân ve ibtidâ-yı eyyâm-ı siyâm olduğu sâbit ve mütehakkık olmağın bir de’b-i dîrîn devlet-i aliyye-i ebediyyü’l-istimrâr cümle mü’minîn ve mü’minâta beyân ve i‘lâm içün minârât-ı cevâmi‘ ve mesâcid kanâdil nûr-efşân ile müzeyyen olmak içün selâtîn-i i‘zâm cevâmi‘-i şerîfleri kayyımlarına tenbîhi hâvî emr-i âlîleri sudûru ricâsıyla İstanbul Mahkemesi’nden huzûr-ı âlîlerine i‘lâm olundu el-emrü li-velilliyi’l-emr. Sene 1202.