İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 171 Hüküm no: 171 Orijinal metin no: [45b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Celep taifesinin getirdiği koyunların kasaplar arasında paylaşılıp dağıtılmasının emredildiği Ma‘rûz İstanbul hısn-ı ebvâbından Yedikule ve Eğrikapı hâriclerinde vâki‘ selhhâne ashâbı kasab ustalarından es-Seyyid el-Hâc Mehmed Ağa ve el-Hâc Osman Ağa ve es-Seyyid Halil Ağa ve İsmail Ağa [ve] Mehmed Emin Ağa, Feyzullah Ağa, el-Hâc Ömer Ağa, el-Hâc Hasan Ağa meclis-i şer‘-i şerîf-i enverde celeb zümresinden arzuhâl eden Todori ve Dimitri ve Kostantin ve Yorgi ve Horoni ve Yenaki nâm zimmîler muvâcehelerinde hâlâ sekbânbaşı izzetlü Mustafa Ağa tarafından vekîli yazıcı miyâne Mehmed Efendi ve Kasabbaşı Mehmed Emin Ağa tarafından vekîli kasablar kethüdâsı el-Hâc Ali Ağa hâzır oldukları hâlde mersûmûn Todori ve Dimitri ve Kostantin ve Yorgi ve Horoni ve Yenaki zimmîler Çilingir nâm karye kurbünde mevcûd altı bin re’s ağnâmlarını derhâl beyninizde tevzî‘ ve iktisâm edin deyü bize âgâh ve ibrâm eylediklerinde biz dahî Şevvâl-i Şerîf’in yirminci gününe değin vâfî ve kâfî bi-hamdillâh-i te‘âlâ yedimizde ağnâmımız vardır deyü mersûmûnun ağnâmlarını derhâl iktisâmdan imtinâ‘ etmişidik elhâletü hâzihî beynimiz tevfîk olunup Şevvâl-i Şerîf’in beşinci günü mersûmûnun [46a] ağnâmını beynimizde tevzî‘ ve taksîme ta‘ahhüd eyledik deyü eyledikleri bi’l-cümle takrîr-i meşrûhlarını mersûmûndan her biri tasdîk eyledikleri İstanbul Mahkemesi’nden huzûr-ı âlîlerine i‘lâm olundu. Fî 24 min Ramazâni’l-mübârek sene 1202.