İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 212 Hüküm no: 227 Orijinal metin no: [61a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgânî Mehmed Ağa’nın boş bir vakıf arsası bitişiğinde kiracı olarak bulunan kalaycı ve manav dükkanlarını yıkarak yeni ve geniş bir bina yapmak için izin aldığı Ma‘rûz Nezâret-i aliyyelerinde âsûde evkâfdan zikri âtî iki bâb dükkân ve menzil arsasına bi’l-icâreteyn mutasarrıf olan Yorgânî Mehmed Ağa b. Osman sâdır olan emr-i âlîlerine imtisâlen evkâf müfettişi müderrisîn-i kirâmdan İbrahim Efendi dâ‘îleriyle bi’l-ma‘iyye dâ‘îhânede ma‘kûd meclis-i şer‘-i münîrde arzuhâl eden Kalaycı İbrahim b. İsmail ile terâfu‘larında vakf-ı mezbûr mütevellîsi el-Hâc Mustafa Efendi hâzır olduğu hâlde Ahmed Kethüdâ Vakfı’ndan olup İstanbul’da Cezerî Kasımpaşa mahallesinde Kapalı Fırın nâm mahalde vâki‘ beyne’l-ahâlî ve’l-cîrân ma‘lûmü’l-hudûd bir bâb kalaycı dükkânı ve ittisâlinde bir bâb manav dükkânı ve verâsında menzil arsası beher şehr otuz akçe icâre-i mü’eccele ve mu‘accele-i ma‘lûme ile cem‘an iki yüz üç zirâ‘ arsa menzil ve dükkân-ı mezkûrlar bâ-re’y-i mütevellî benim tasarrufumda olup hâlâ arsa-i mezkûre üzere mu‘accelesine mahsûben mâlım ile menzil binâ murâd edip lâkin arsa-i mezbûre zıyk olmağla tevsî‘ içün zikr olunan kalaycı ve manav dükkânları arsalarını dahî menzil-i mezkûra zam ve ilhâk etmeğe muhtâc olduğuma binâ’en târîh-i i‘lâm şehri gâyetinde zikr olunan kalaycı dükkânında müşâhereten müste’cirim mezbûr İbrahim ile fesh-i akd-i îcâr etmemle mezbûr İbrahim âhar şehr-i mezbûrdan kalaycı âlâtı ref‘ ve dükkân-ı mezkûru tahliye ve bana teslîme tenbîh olunmak murâdımdır dedikde mütevellî-i merkûm dahî dükkân-ı mezkûrların arsaları menzil-i mezkûra zam ve ilhâk ve müstakillen bir bâb menzil olması vakfa enfa‘ olmağla izin vermeğin mûcibince dükkân-ı mezkûru tahliye ve müdde‘î-i mezbûra teslîme merkûm İbrahim’e tenbîh olunduğu huzûr-ı âlîlerine i‘lâm olundu. Fî 2 min Zilhicceti’ş-şerîfe sene 1202.