İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 212 Hüküm no: 226 Orijinal metin no: [60b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hoca Gıyaseddin mahallesi imâmı Hâfız es-Seyyid Mehmed Efendi hakkında yapılan soruşturmada halkın kendisinden memnun olduğu Ma‘rûz Bâ-emr-i hazret-i veliyyü’n-na‘mî savb-ı şer‘-i enverden mürsel Başkâtib Ahmed Efendi İstanbul’da Süleymâniye kurbünde Hoca Gıyaseddin mahallesi câmi‘-i şerîfine varıp mahalle-i mezbûre imâmı Hâfız es-Seyyid Mehmed Emin Efendi’nin keyfiyet-i ahvâlini mahalle-i mezbûre ahâlîsinden mazbûtü’l-esâmî yirmi nefer ve civâr mahalleden üç nefer ki cem‘an yirmi üç nefer kimesnelerden suâl eyledikde imâm-ı mezbûr Hâfız es-Seyyid Mehmed Emin Efendi mahalle-i mezbûrede imâmımız ve muhtârımız olup kendi hâlinde ırzıyla mukayyed ve imâm olduğu müddetden bu âna gelince kat‘â hilâf-ı şer‘-i şerîf vaz‘ ve hareketi ve iktidârı münâfî sû-i hâlî olmamağla cümlemiz kendiden hoşnûd ve râzılarız deyü her biri hüsn-ı hâlini haber verdiklerinde imâm-ı mezbûr dahî mukaddemâ olan töhmetine tâ’ib ve müstagfir olduğunu mevlânâ-yı mezbûr mahallinde ketb ve tahrîr ve ma‘an mürsel ümenâ’-i şer‘le meclis-i şer‘a alâ vukû‘ihî inhâ ve takrîr eyledikleri İstanbul Mahkemesi’nden huzûr-ı âlîlerine i‘lâm olundu. Fî 29 min Zilka‘de sene 1202.