İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 236 Hüküm no: 257 Orijinal metin no: [70b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sıvacı oğlu Dimitraki’nin, kendisini bıçaklayan Dimitri v. Kostantin ile belirli bir meblağ üzerine sulh oldukları Ma‘rûz Hâmiş-i arzuhâlde muharrer derkenâr nâtık olduğu üzre mecrûh Sıvacı oğlu Dimitraki v. Yovan nâm zimmî meclis-i şer‘-i şerîf-i enverde hâlâ Tersâne-i âmirede vaz‘-ı kürek olunan cârih-i mersûm Kalyoncu dimekle ma‘rûf Dimitri v. Kostantin nâm zimmî tarafından vekîli Pavli v. Sava muvâcehesinde müvekkil-i mersûm Dimitri bundan akdem beni bıçakla göbeğim üzerinden amden darb ve cerh etmekle mûcib-i şer‘îsini taleb ve da‘vâ etmişidim elhâletü hâzihî bâ-vesâtat-ı muslıhîn ben da‘vâ-yı mezkûremden vekîl-i mersûm ile yüz elli guruş bedel-i makbûza sulh olup ba‘de’l-yevm husûs-ı mezkûra müte‘allika da‘vâdan ben müvekkil-i mersûmun bedel-i sulh olup ba‘de’l-kabz umûruma sarf-ı istihlâk eylediğim meblağ-ı mezkûr yüz elli guruşun mutâlebesine müte‘allika da‘vâdan vekîl-i mersûm benim zimmetimi ibrâ ve iskāt ve her birimiz âharın ibrâsını kabûl eylediğimizden sonra müvekkil-i mersûm fîmâ ba‘d kendi kâr u kesbiyle meşgûl olup bana darb ve şetm ve vücûh-ı âhar ile ta‘addî etmeyeceğinden işbu meclis-i hâzırûn Fındıklı’da mütemekkin Nikola v. Panayot Küçük Karaman’da mütemekkin Petro v. Kabrayil ve Malta Çarşısı’nda mütemekkin İlya v. Pavli nâm zimmîlerden kefîl oldular deyü eylediği bi’l-cümle takrîr-i meşrûhunu mersûmûndan her biri tasdîk ve cârih-i mersûm Dimitri zimmînin ıtlâkını iltimâs eyledikleri huzûr-ı âlîlerine i‘lâm olundu. Fî 12 min Muharrem sene 1203.